Tlabung-in RD Block headquarters an beisei

Tlabung Town All VC & NGO chuan thuchhuah siamin, Mizoram sorkarin Tlabungah Rural Development headquarters din tuma hma a la mek chu lawmawm an tih thu an tarlang a; Tlabungah RD Block thar hawn a nih ngei an beisei thu an sawi.

Tlabunga VC leh NGO-te chuan, West Tuipui constituency chhunga a hmasa ber atan Tlabungah RD Block thar din a nih theih nan Tlabung khuaa VC, tlawmngai pawl leh zirlai pawlte'n hun rei tawh tak aṭanga hma an lak thu an sawi a, "Tlabunga RD Block thar hawn hi kawng hrang hranga thlirin thil tih àwm leh ṭûl tak a ni," an ti.

Tlabunga RD Block din turah thil hriat fuh tâwk loh lian tak a awma an hriat thu leh chumi vanga dodâlna nia ngaih theih a awm chu pawi an tih thu sawiin VC leh NGO-te chuan, "Hnam inchîmralna tur ang thawthánga insawi ṭhaih chi a ni lo. RD Block thar hawn a nih pawhin, hnam dang khua ni lo, Tlabungah ngei headquarters a awm dawn a, ram leh hnam humhalhna bang chhah ṭha takah kan ngai a, Mizote tan a lâwmawm êm êm zâwk a ni," an ti a; Tlabungah RD Block headquarters dah ni lo se, eng tikah emaw hnam dangte'n an khua ngeia dah an la ngiat thei tih an sawi.

Tlabung VC leh NGO-te chuan, an khua chu Mizote chênna dik tak a ni tih sawiin, "Kum 2019-a MṬKP Inkhâwmpui lian thleng tur, Mizorama Civil Sub-Division upa ber leh sorkar pisa changtlung tak awmna a ni. Sorkar department pakhat bial thar hawn belh a nih dawn avangin, Mizo hnam dinhmun a him loh sawtna chhan tur a awm lo a, kawng tam takah kan chhawrin kan ṭangkaipui dawn zâwk a ni," an ti.

Tlabung khua hi Mizoram sorkara notified town a ni a, kum 1871-a din niin, British sorkar hnuaia Chittagong Hill Tracts superintendent Lt.Col. TH Lewin-a'n a awm chin ṭhin.

Kum 2011 chhiarpuiah mihring 4,554 chengin, mipa 2,267 leh hmeichhia 2,287 an ni a; chhungkua 976 an awm a ni.