NIB-in CAG report an chhâng lêt ; NLUP a hlawhtlingah an ngai

NLUP Implementing Board (NIB) chu nimin khan vice chairman PL Thanga hoin NLUP conference hall-ah an ṭhukhawm a; Comptroller Audit General (CAG) report-in NLUP chungchang a tarlante an sawifiah a, NLUP chu a hlawhtlingah an ngai.

NLUP a hlawhtling nia tar­langin NIB chuan, "NLUP-in a thil tum hlawhtling lo anga puhna chungchangah thu dik tawk lo a awm niin a lang. Input supply target-ah department zawng zawng tih theih deuhthaw a intodelh tawh a, thar chhuah tihpun chungchangah hmunphiah economy ringawt pawh hi kum 2009-ah cheng nuai 37 aṭangin kum 2016 khan Rs. nuai 5,704 a kai chho a ni," an ti.

Department hrang hrangah hlawhtlinna chhuanawm tak a awm laiin, NLUP Monitoring Agency atana ruat MIzoram University, NABCONS (NABARD Agency)-te leh a dangte report-ah hlawhtlinna hrang hrang tarlan a nih thu an sawi.

NIB-in NLUP a sawifiah dan :
Baseline Survey: YMA hmangin khaw tinah neih a ni a, list-te chu khaw hrang hranga YMA-in an district enkawltu DC hnenah an thehlut a, NIB office-in DC office aṭangin an dawng ve zawk. Village Level Committee-te hnenah Baseline Survey Report pe lo anga sawi hi thu belhchian dâwl lo a ni. NIB aṭangin DC zawng zawng hnenah list-te hi a ṭul anga pe tura instruction pek an ni. September 2009-a YMA survey neihah vawiin thlenga complaint a awm loh avangin survey report rintlak takah ngaih a ni.

Compact Area: Khaw tinah beneficiary ṭhahnem tak thlan vek a nih avangin Mizoram hi cluster area/compact area 40-ah ṭhen a ni a, sorkar laipui scheme danga compact area nen danglamna a awm lo. 

Beneficiary thlan: NLUP Apex Board-in NLUP beneficiary a thlang anga an report hi thu belhchian dâwl lo a ni. Beneficairy zawng zawng hi Village Level Committee-in thlangin, DC-ah pe a, DC aṭangin NIB-ah a lut a, NIB-in a endik hnuin NLUP Apex Board-in formal approval a pe a ni zawk. First phase ṭan dawn khan beneficiary thlante rintlak a nih leh nih loh endik turin neutral body, MZU rawih a ni a, Aizawl leh a chhehvel cluster 10 (MLA bial 10)-a beneficiary thlante uluk taka endik niin, dik loa ngaih eng emaw zat cancel a ni.

NLUP hmu tlak lo chungchang: A tir aṭanign NIB hian NLUP Manual a buatsaih a, Manual-ah hian eligibility criteria felfai taka siam a ni a, NLUP Apex Board-in a pawm hnuin uluk taka kalpui a ni. DC zawng zawngte hnenah Village Level Committee thlante uluk taka endik tura hriattir an ni a, mi 1,178 chuang cancel a ni tawh. Hmu tlak lo anga ngaih report NIB-in a dawn hi ngaihthah pakhatmah a awm lo. Audit party hnenah dik lo anga lang an hriatte sawi turin audit lai aṭanga ngen an ni a, tun thleng hian hming pakhatmah department emaw, NLUP Board-ah emaw, Accountant General Office aṭang hian dawn a la awm loh avangin an thu ziak hi finfiah theih a ni lo.