Rajya Sabha-ah BJP-te brake Kan rah sak thei - Ronald Sapa

Rajya Sabha MP Ronald Sapa Tlau chuan, BJP-te chu an duh thálin chet tum mah se, Rajya Sabha-ah an tlem zawk avangin an brake an rah theih thu a sawi.

Ronald Sapa hian nimin khan Congress Bhavan-ah thu sawiin, "Tunlaia India ram titi ber chu, bawng talh khap leh humhalh chungchang a ni. India ram sum deh chhuah 18% lai hi bawng/lawi sa leh a kaihhnawih aṭanga kan hmuh a ni a, hemi kaihhnawiha eizawng hi mi nuai tam tak an awm a ni," a ti.

Hindutva policy nei BJP thli tleh duai duai angin lang mah se, India Constitution siam danglam tur emaw, an duh anga kal tur emaw chuan a khirh rih hle nia sawiin Rajya Sabha MP chuan, "Lok Sabha-ah an duhthálin che mah se, Rajya Sabha-ah BJP hi a tlem zawk an nih avangin an brake kan rap thei," a ti a; BJP leh RSS-te chu an chet nat poh leh a sawhkhâwk a na dawn niin a sawi.

Ronald Sapa chuan, Uttar Pradesh-ah farmer loan ngaihdam an tiam avangin loneitute leh kuthnathawktu tam takin BJP an vote a, loan ngaihdam nan cheng vaibelchhe sing tel ruahmanna an siam tih sawiin, "Hei hi state tam zawkin Central chu ruahmanna siam ve tura an nawr avangin harsatna leh buaina an tâwk chho mek a ni," a ti.