KHAWTHLIR

Complex enfiah
Parliamentary secretary (School Education) Joseph Lalhimpuia chuan Serchhip-a Education Complex sak zawh thar, la hawn loh chu Ningani khan a tlawh a, siam ṭhat ngaite leh thil la tih ngaite a enfiah. Serchhip Education Complex hi Lushai Engineer-te sak a ni a, a sakna atan cheng nuai 120 ruahman a ni.

Tui lianin la
Vanlalzawna (67), Tlungvel Field Veng chu Ningani chawhma dar 11 vel khan a ram kalnaah tui lianin a la a, Ningani vek tlai dar 4:30 velah tuiin a lakna aṭanga metre 400 velah a ruang hmuh a ni.

Hriattir tur
Traffic SP C Lalthanmawia chuan thupek chhuahin, AMC huam chhunga lirthei vanga chhiatna thleng, leimin vanga kawng tlang lo, lirthei tlan lohna tura a tlan vanga harsatna thleng a awmin a rang thei ang bera Traffic Control Room-ah hriattir turin mipui a ngen. Traffic Control Room telephone number chu 0389-2322307, 0389-2313061 leh 9485302049-te a ni.

College thar
Helen Lowry Higher Secondary School chu academic session 2017-18 aṭangin college-ah hlan kai a ni dawn a, tunah hian admission hun hawn mek a ni. Arts-ah English, Political Science, History, Economics, Sociology leh Education-te a awm dawn a, Commerce zir theih a ni bawk ang.