Congress sorkar tla tur an che fuh hlei thei tawh lo - Zoramthanga

MNF president Zoramthanga chuan, Congress party kaihhruai sorkar chu kohhran, zirlai, NGO leh mipui mimirin an kham tawh avangin na takin an tla dawn niin a sawi a, "Congress tla tur hi an che fuh hlei thei tawh lo," a ti.

Nimina Champhai Venglai community hall-a MNF Champhai South Block Conference a hmanpuinaah Zoramthanga chuan, CM Lal Thanhawla'n MNF-te CBI a koh luhsak thei nia a sawi chungchangah, "Ka chhanna chu, a pawisa chawi ngai zat leh a pekna hmun tur chu Court lam sawi tur a ni, tih hi a ni," a ti a; Lottery leh Zo Carbon chungchang chhui tura CBI ko lut tura thil

ṭul a piangte ti turin CM Hawla hnenah lehkha an thehlut tawh tih a sawi.

Chief Minister dinhmun chu, tapchhak záwla sakei hlau lo anga sawi a, sakei tak tak tawna hlauthawng leh si ang vel nia sawiin Zorama chuan, "Engmah an sawi dik thei tawh lo a, an ti dik thei tawh hek lo. Zu zawrh chungchang House-a an sawiah an chhep sual nasa hle a. Contract hna inpekah pawh an tifuh hlei thei hek lo," a ti.

MNF President chuan, Congress sorkara eiruknate hai chhuah belh zel a nia sawiin, "Mimal inhai vûrna ringawt an buaipui hrang hrangte hi kan sorkar hunah kan chhui chhuak vek ang a, a hlâwk lohzia an la hre khawp ang," a ti a; Congress sorkarah hma-sawnna hmuh tur a awm lo niin a sawi.

SEDP chungchang sawiin Zoramthanga chuan, link road siama hmalakna an ngai pawimawh dawn tih a sawi a, "Tuna kan party-a thawk hahte hi link road hna thawh a, contract hna tam tak lo chhuah huna thawk turah duhsak hmasak bik in ni ang," a ti.

Zoramthanga chuan, SEDP atana sum hmuhna tur an hre sa vek nia sawiin, "Sum lamah harsatna a awm hauh lo ang," a ti a; "SEDP hmangin ram malsawmna kan hai chhuak ang a, chawa intodelh kan tih hian sa, thlai hrang hrang, bawnghnute leh hriakte a huam vek a ni," tiin, Delhi tel loa economy kalpui chu an tum lian ber a nih thu a sawi bawk.

MNF thuchhuah chuan, nimina Cham-phaia block conference-ah hian Zoram-thanga'n Champhai South chhung khua/veng hrang hrang aṭangin mi 421-te MNF-ah a lawm lut niin an tarlang.