Khawtlang hruaitute leh BSF hotu inkâwm

Tlabunga Village Council, YMA branch hrang hruaitute leh Tlabung Progressive Society member-te chuan, nimin khan Tlabunga BSF Border Outpost-ah 159 BSF commandant LS Dahiya an kâwm a; sorkar laipuiin ramri tihhmasâwnna tura a duan Border Area Development Programme hman dan a dik tâwk loh thu sawi lan a ni.

LS Dahiya chuan, BSF-in khawtlang rawng an bàwlna tura tih theih an neih apiang hlen chhuah an tum thu sawiin, Tlabungah helicopter a service theih nan thil ṭûl leh buaipui ngaite an bawhzui mek thu a sawi.

LS Dahiya chuan, BSF-te'n a thlâwna computer leh English leh Hindi zir theihna tur hawn an tum thu leh, a thlâwna inentirna hun buatsaih an tum thu sawiin, "Ramri vên bakah, kawng hrang hranga ramria mipuite dinhmun cháwi kâng tur-in theihtawp kan chhuah dawn a ni," a ti.

BSF Commandant chuan, BADP chu ramria khuate tihhmasâwnna tura sorkar laipui duan ni mah se, ramri hrúla awm Tlabung leh a chhehvel khuate'n an chang mang lo tih sawiin, "BADP sumin a thlenna tur dik a thlen theih nan theih-tawp chhuahin hmá kan la ang," a ti a; a ṭul chuan sorkar laipuiah bawhzui a nih tur thu a sawi.

Tlabung leh Lung-lei inkalpawhna kawng chhiat vanga ramri vên kawnga harsatna an tawh hrang hrangte sorkar laipuiah a thlen tawh tih sawiin LS Dahiya chuan, "Kawng chhe lutuk hian ram leh a chhunga chêng mipuite himna tura hna kan thawh kawngah harsatna tam tak min thlen a ni," a ti. Khawthlangtuipui kaltlanga ram páwna dân loa thing leh mau tam tham tak hralh ṭhin a ni chu pawi a tih thu leh, titâwp turin khaw-tlang hruaitute puihna an mamawh thu a sawi bawk.

Inkawmnaah hian BSF leh mipui inkara thawhhona ṭha zawk a awm theihna tura an ngaih pawimawh leh vei zawngte an sawi a; Tlabung khawtlang hruaitute chuan, Tlabung ngaihsaktu BSF hotu an nei chu lâwmawm an tih thu an sawi a ni.