M/S zirlai tan hnam làm intihsiak buatsaih

Thenzawl Cultural Club chuan, Ningani leh Zirtawpni khan Thenzawl Loṭhazawlah middle school zirlaite tan Mizo hnam làma intihsiakna an buatsaih a, Mizoram State Commission for Women chairperson Vanlalawmpuii Chawngthu, MLA-in a hmanpui.

Intihsiaknaah hian Thenzawl SDEO huam chhunga middle school pakua aṭangin zirlaite an tel a; Ningani khan khuallàm hmangin an intihsiak a, nimin khan cheraw (buh-za-aih) hmangin an intihsiak leh a ni.

Vanlalawmpuii Chawngthu chuan, naupan lai aṭanga Mizo hnam zia leh nunphung leh hnam làm teinzirtir chu ṭha a tih thu sawiin, "Hnam fing apiangin an hnam culture an ngaisang a, Zo hnahthlakte'n kan hnam ziaráng pho chhuah hi khawi hmunah pawh awm ila kan tih tur a ni," a ti.

Mizo hnam nun ze mawi, aia upa zah chu ṭhang-tharte'n an zir thar a ṭul thu sawiin Vanlalawmpuii chuan, "Aia upa zah te, tlawmngaihna lantirte hi kan Mizona tihlanna ni a, uar zel a ṭul a ni," a ti a; Mizo nula leh tlangvalte'n Mizo ngei nupui/pasalah nei se a duh thu sawiin, "Mizote hi hnam tlem kan la ni a, hnam dang nei lo tura inzirtir uar a ṭul a ni," a ti bawk.

Cultural Dance Com-petition-ah hian pakhatnain Rs. 8,000, pahnihnain Rs. 6,000 leh pa-thumnain Rs. 4,000 an dawng. Pakhatna chu Zoram Middle School an ni a, Centenary Middle School chu pahnihna niin, Victory English School chu pathumna an ni.