Chite humhalh tura hmalakna thlirho

Save Chite Lui Coordination Committee (SCLCC) chu, nimin khan Governor Lt.Gen. Nirbhay Sharma hoin Raj Bhavan-ah an ṭhukhawm a, survey report an thlirho.

Governor chuan, Chite lui chhanchhuak tura tlawmngai pawl hrang hrang hruaitute leh sorkar mi pawimawhte lungrual taka an ṭhukhawm thei leh pheikhai rual taka thawkho tura an insuih-khawm thei chu ropui a tih thu sawiin, "India ram hmun tam takah lui, dîl leh tuihna humhalhna tur-in sorkar laipuiin cheng vaibelchhe tam tak a sên tawh hnuah pawh a ṭha zawnga rah chhuah hmuh tur a awm mang lo," a ti a, Chite lui chhan tura beihna chu a hlawhtlin ngei a rin thu a sawi.

Meeting-a tarlan danin, baseline survey titute'n Aizawl Municipal Corporation huam china Mel-thum ram chuanhnuai thleng an zo tawh. Tunah hian Aizawl veng hrang hranga hnár nei Chite lui châwmtu luite hrang hrang zir chian hna an thawk mek a, thla khat chhunga zo tura ruahman a ni.

Chite lui hi Aizawl khawpui leh a chhehvela damdawi-in ṭhenkhat thliin nasa takin a tibawlhhlawh tih baseline survey aṭanga hmuh chhuah a ni.

Chite lui tibawlhhlawhtu hmuh chhuah chung-changah hian Committee chairman, chief secretary Lalmalsawma chuan, sokar angin rang taka an lo ûm zui tur thu a sawi.