In sak ṭanpui dilna pawm

Lunglei District Screening Committee chu DC mawhphurhna la mektu K Lalrohlua hoin nimin khan a pisaah an ṭhukhawm a, Pradhan Mantri Awas Yojana - Housing for All (Urban) hnuaia in sak ṭan-puina dawng tur chawp chhuahte an pawmpui.

Committee chuan, Beneficiary led Construction (BLC) hnuaia beneficiary mi 2,666 awmna list a lo pawmpui tawh a, sorkar laipuiin 1st. DPR-ah mi 2,450 tan chauh in sakna a pek theih avang-in, mi 216-te chu hnâwl rih an ni.

Tun dinhmunah dilna 2,450 aṭanga 2,324-te chauh thun theih a nih avangin Committee chuan mi 216-te chu 1st. DPR-a hmun ruak 126 la awmah emaw, 2nd. DPR-ah tal an luh ve theih nan UDPA lamin hma lo la se, an ti.

Lunglei (2nd. DPR), Hnahthial leh Tlabung aṭanga in sak tanpuina dil, verification leh public hearing nei zo tawhte chu eligible applicant-ah pawmpui a ni a; chung-te chu Lunglei (2nd. DPR) aṭangin mi 404, Hnah-thial aṭangin mi 760 leh Tlabung aṭangin mi 596 an ni.