MLA, CADC CEM leh hruaitu dangte Eirûk thubuaiah táng tura tih an ni ; Man an nih hmain Court-in bail a phalsak

Cheng nuai 137 tihchingpen thubuaiah Special Court (PC Act) judge Vanlalenmawia chuan nimin khan MLA Dr BD Chakma, CADC CEM ni lai Buddha Lila Chakma, MDC ni mek pali leh MDC hlui pasarihte chu kum khat tang tur leh Rs 10,000 ṭheuh chawi turin a hrem. Mi 13-te hi nimin vêk khan Special Court chuan bail-in a chhuah.

Chakma Autonomous District Council (CADC) hruaitu hlui leh hruaitu ni mek mi 13-te hi Special Court (PC Act) chuan July 22, 2022 khan eirûk thubuaiah PC Act 1988 Section 13(1)(d) leh Section 13(2) hmangin thiam loh a chantir tawh a, nimin khan hremna thupek a puang a ni.

Court thuremnaa a lan danin, mi 13-te chu kum khat chhung jail-a táng tur leh Rs 10,000 ṭheuh chawi tura tih an ni a; pawisa an chawi tur chu an chàwi loh chuan kum khat bakah, ni 30 dang an tàn belh ang. Hrem an nih dan tur puan a nih lai hian mi 13-te hi Court-ah an awm a ni.

Kum 2013-2014 vel khan sorkar laipui aṭanga hmasawnna hna thawhna tur sum kal chu khatih laia CADC hotute'n hlawh atan an insem a, mahse, thubuai chhui a nih laiin pawisa chu an rûl vek hman thung. Court chuan, pawisa chu rûl tawh mah se, dan loa thil an tih avangin thiam loh a chantir a ni.

Mi 13-te hian nimin vêk khan Special Court-ah bail an dil nghal a, Court chuan a phalsak. Mi 13-te chuan Special Court thuthlukna chu Gauhati High Court, Aizawl Bench-ah khin lêt an tum avangin dan anga bail an dilna chu phal­sak a nih thu Special Judge chuan a sawi.

CADC sorkar sum hman dan chhuinaah sum tihchingpen a awm tih hmuin District Council & Minority Affairs under secretary Zohmingthanga chuan April 20, 2018 khan ACB-ah FIR a thehlut a; ACB chuan chhui zuiin, April 26, 2019-ah Court-ah charge­sheet an thehlut a ni.

Court-in táng tura a tih zinga mi, BJP MLA Dr BD Chakma, Tuichawng bialtu chu sum tichingpena puh a nih lai hian CADC-ah chief executive member (CEM) a ni a; Buddha Lila Chakma chu CEM a nih mek bakah, a hma pawhin CEM a lo ni tawh.

Táng tura tih zingah CADC executive member ni mek pahnih - Ajoy Kumar Chakma leh Mohan Chakma an tel a; member of district council (MDC) ni mek pahnih - Buban Kumar Chakma leh Amit Kumar Chakma an tel bawk. Mi dang zawng chu kum 2013-2018 chhunga MDC an ni.

Thiam loh chantir zinga CEM, EM leh MDC ni mek mi pangate chu April 20, 2018-a MADC term 10-na atana inthlanah Congress party mi vek an ni a, tunah erawh chuan MNF-ah an lut vek tawh nia thu dawn a ni. Thubuai an neih tirhah an vaiin ACB-in an man vek tawh a, mahse, man an nih ní-ah bail-a chhuah leh nghal vek an ni.