Sorkara a nghet loa thawkte'n Nimin thlengin hlawh an la la lo

Mizoram sorkar hnuaia a nghet lo thawk - muster roll, provi­sional employee leh workcharge-te chu July hlawh an lâk hun tawh mah se, nimin thleng khan an la la thei lo.

Thu dawn danin, Mizoram sorkara a nghet loa thawk leh a ngheta thawkte hi hlawh an lâk dan kalphung a inang lo a; a nghet loa thawkte tan thla khata ni 20-na hi thla thar a ni a, ni 20-na velah hlawh an la tlangpui. An thawhna department-te chuan July thla hlawh an lâkna tura thil pawimawhte Treasury-ah an thehlut vek tawh a, mahse, nimin thleng kha chuan Treasury-in hlawh tur sum a la pe chhuak lo a ni.

Tun hnaiah Treasury hian ni khata sum pek chhuah theih zat (ceiling) an nei mumal lo a, Finance department-in bill pek chhuah tura an tih ang ang an pe chhuak ṭhin. Sorkar hna a nghet loa thawkte hlawh tur pawh Finance department aṭanga thu an hmuh hma chuan an pe chhuak thei lo nia thu dawn a ni.

Hetih lai hian, sorkar hnathawk nghette pawhin kumin July thla hlawh chu August tìrah an lâk theih dawn leh dawn loh hriat a la ni lo. Department-te chu hlawh tur thehlut turin hriattir an ni tawh thung.