2023-a Serchhip biala ding tur puang ; Seat 30 lâk ngei kan tum - Zoramthanga

Chief minister Zoram­thanga chuan, Serchhip District Hospital thar sakna tur bul ṭanna atan cheng vbc. 13 pek chhuah nghal a ni dawn tih a sawi a; kum 2023-a inthlanpuiah MNF-in seat 30 lâk tlin ngei an tum thu sawiin, Serchhip biala an candidate tur chu J Malsawmzuala Van­chhawng a nih thu a puang.

CM Zoramthanga hian nimin khan Serchhip District Hospital thar sakna atana ruahman Bukpuia Power & Electricity department ram a tlawh a, damdawi-in sak tur bul ṭanna atan Health department-in sum an dil cheng vbc. 13 chu pek chhuah nghal a nih tur thu sawiin, "Hei hi damdawi-in thar sakna tur panna kawng leh thawktute chenna sakna tur a ni," a ti.

MNF thuchhuah tarlan danin, Serchhip dam­dawi-in thar sakna atan hian Power Grid Corporation of India Limited chuan CSR aṭangin cheng vbc. 21 a pe dawn.

Ruahmanna hmasaah chuan, damdawi-in chu tuna a awmna ngai, Bazar Vengah sak tum a ni a, mahse, CM Zoram­thanga'n Bukpuiah sak a nih dawn thu nimin khan a sawi chiang ta a ni.

Nimin vêk khan Ser­chhip Auditorium-a van­tlang inkhawmah thu sawiin MNF president Zoramthanga chuan, kum 2023 Assembly in­thlanpuiah Serchhip con­­stituency-a MNF can­didate tur chu J Malsawmzuala Van­chhawng, MNF adviser ni mek a nih thu a puang a, MNF party-in lung­rual taka an thlan thu a sawi tih MNF thuchhuah chuan a tarlang.

Zoramthanga chuan, kum 2023 inthlanpuiah MNF-in seat 30 lâk tlin ngei an tum thu sawiin, ama tan bial dang en a ṭul lo a, Aizawl East-I ah nghet taka a awm mek thu a sawi a, "Tun ang boruaka an kal zel chuan ZPM hian seat 10 an lâk phak ka ring lo, seat an neih mek pawh an hum ang em tih ngaihtuah tham a ni," a ti.

MNF President chuan, Congress party chu Delhi chakna hmang an nih thu sawiin, "Khu lamah a bûrpui a tlu a, he lamah a phitá a râwp ral zel mai a ni," a ti a, Congress party lenna ber ṭhin hmar­chhakah an râwp ral zel niin a sawi a ni.