Governor-in IIT leh NIT hotute a kâwm

Governor Dr Hari Babu Kambhampati chuan nimin khan Raj Bhavan-ah Indian Institute of Technology (IIT) Tirupati director Prof. KN Satyanarayana leh National Institute of Technology (NIT) Mizoram director Prof. S Sundar te a kâwm.

Inkawmnaah hian leimin vanga harsatna thleng ṭhin pumpelh dan tur te, science thiamna hmanga Mizorama kut hnathawktute hmalakna ṭanpui dan tur leh NIT, Mizoram building sak hna thawh dan tur chungchangte sawiho a ni.

Governor chuan, thlai leh thei ṭhenkhat tan Mizoram leilung a ṭha bik nia sawiin, "Dragon fruit, lakhuihthei leh thei dang ṭhenkhatte hi hmun dang aiin Mizoramah a thar ṭha bik a, Mizorama tharte hi a tui bik. Dragon fruit chìn leh tharah phei chuan Mizoram hi India rama hma hruaitu a ni a, state dangte pawhin an entawn mek," a ti.

Sum chang thlai leh theite chu science thiamna nena kut hnathawktute ṭanpui an nih chuan hlâwk zawka thar theih a ni tih sawiin Larsap chuan, "Awmze nei zawka hmalak a nih theih nan NIT, Mizoram pawhin ngaihtuahna sêng se, campus an neih hunah phei chuan innovation hub din thei se a ṭangkai hle ang," a ti a; NIT, Mizoram hmun tur ram tihfel chhung a rei chu pawi a tih thu leh tunah a fel thawkhat ta chu lawmawm a tih thu a sawi.

NIT director Prof. S Sundar chuan, NIT, Mizoram tan campus leh building an neihna turah ṭan lak phawt an tum thu a sawi a; hun rei tak environmental clearance buaipui a nih hnuah Mizoram sorkar leh NIT, Mizoramin a hmáwr an bâwk ṭep thu te, Ministry-ah an dilna a awm tawh thu te, hun rei vak loah chuan NIT, Mizoram campus siam leh in sak ṭan theih an beisei thute a sawi bawk.

NIT, Mizoram hmun nghet tur chu cheibàwl a, in sak ngaite sak phalna a rang lama hmuh a nih theih nan Governor chu sorkar laipuia nawrpui turin Prof. S Sundar chuan a ngen a ni.