Lalna leh thuneihna ringawt âtchilh vangin mipui an rûm - ZPM Consultant

ZPM consultant F Rodingliana chuan nimin khan ZPM pisaa inkhawm­ah thu sawiin, ram hruaitute’n lalna leh thuneihna ringawt an âtchilh avangin mipui an rûm tih a sawi a, Pathian lalna ram din turin ZPM a insiam­rem mek thu a sawi bawk.

F Rodingliana chuan, "Pathian lalna ram din tur leh a duh dana thawk turin ZPM a insiamrem a, a ding nghet tâwk a ni," a ti a; Mizote hnama siamtu leh ram petu Pathian lakah nasa takin an péng bo mek nia a lan thu sawiin, "Ram hruaitute’n lalna leh thuneihna ringawt an âtchilh avangin mipui kan rûm a, hetianga kan awm reng lohna turin mipuite'n rilru puthmang leh ngaihtuahnate kan thlak a ngai tawh a ni," a ti.

ZPM Consultant chuan, Mizoram chu a hruai­tute’n lemchanna ramah an chhuah nia sawiin, "Anmahni ngei pawhin a hlawhtlin an rin rêng rêng loh turte chu awihawm hmel taka sawiin mipui an thlêm a, kan thlan lal hnuah an intiamna an tihhlawhtlin theih si lohte chu phat marna an zawng leh ṭhin," a ti a; ZPM party pawhin insiamṭhatna tur an nei thei tih a sawi rualin, party dang anga mi sûlhnu chhuia kûn kûn tur an nih loh thu a sawi bawk.

ZPM thuchhuah chuan, nimina inkhawmah hian MNF Gen. Hqrs. joint secretary aṭanga báng ta H Lalrempuia chu ZPM-ah an lâwm lut tih a tarlang.