BJP President-in risk manifesto siamah sorkar ding tawhte a puh

BJP Mizoram Pradesh president Vanlalhmuaka chuan, Mizorama sorkar ding tawhte'n 'risk manifesto' an siam ṭhin nia sawiin, Mizoram BJP erawh chuan central BJP hriatpuina thlapin manifesto an siam a, an thutiamah an ding niin a sawi.

Vanlalhmuaka hian nimin khan BJP pisaah thu sawiin, "Mizoram sorkar kan hrawn tawhte'n an manifesto neih reng reng an siam ang thlapa an tih a váng hle a, risk manifesto an siam a ni ringawt. BJP erawh chuan kan tih theih loh tur mipui hmaah kan tiam ve ngai lo. Central BJP hriatpuina thlapa manifesto siam kan ni a, central BJP chu thutiamah an din avangin kan ti ngei dawn a ni," a ti.

Mizoram chu cancer vei ang mai a nih thu sawiin Vanlalhmuaka chuan, "Mizoram hmasawnna tur hrang hrang Central aṭanga fund kan dawn ṭhin hian a thlenna tur a thlen mai ṭhin loh avangin harsatna tam tak kan tâwk ṭhin," a ti a; tunah chuan CSS sumte state sorkarin ni 21 chiah a kawl thei tawh avangin sorkar hnathawkte'n hlawh an la mumal thei lo ang tih a hlauhawm thu a sawi.

Mizoram BJP President chuan, "Mizoram hian hmasawnna neih kan duh tak tak em? Development kan duh a nih chuan tu nge development hna Mizoram tana thawk thei tur ni ang. BJP lo chu tu mah an awm lo tih hi a chiang viau. Mizoram hmun hrang hrangah development crusade kan nei zel dawn. Mizoram khaw hrang hrang inkalpawhna chhe lutuk hi kan sorkar hunah chuan a awm tawh dawn lo a ni," a ti bawk.