Covid positivity rate sàn ber ní a thleng

July 24, Pathianni khan Mizoramah swab sample 63 endik aṭangin Covid-19 vei mi 36 hmuh chhuah a ni a, positivity rate 57.14% niin, Mizorama a sàn ber ṭum a ni. Nimin khan hripui vei dam tawh mi 187 chhuahtir an ni a, Covid-19 vanga thi an awm lo.

Pathiannia Covid-19 positive hmuh thar mi 36-te chu mipa 20 leh hmeichhia 16 an ni a, rapid antigen test hmanga hmuh vek an ni. Endikna dang hmangin swab sample endik a ni lo. July thla chhungin hripui vei mi 2,608 hmuh chhuah a ni tawh.

Nimin khan hripui vei inenkawl zinga mi 187 chhuahtir an ni a; district tina chhuak zat chu - Aizawlah mi 100, Lungleiah 32, Serchhipah 24, Kolasib-ah 10, Khawzawlah paruk, Mamitah panga, Cham­phai, Saitual leh Hnah­thialah pathum ṭheuh leh Siahaah pakhat an ni.

IDSP record angin, Mizoramah Covid-19 vei 2,31,714 hmuh chhuah a ni tawh a, mipa 1,07,896 leh hmeichhia 1,23,818 an ni a, mipa aiin hmeichhia 15,922-in an tam zawk. Nimin tlai dar 5 thleng khan mi 2,30,289 (99.39%) chhuahtir an ni tawh a, mi 708 (0.30%) thi tawhin, enkawl mek mi 717 (0.31%) an awm.

Nimin tlai dinhmun angin, Mizorama district 11 zingah Covid-19 posi­tive awm lohna district a awm tawh lo a, active case tamna ber Aizawl district-ah mi 353 an awm a, Lunglei district-ah mi 120 an awm bawk.