KHAWTHLIR

President thar lâk luhnaah MP-te tel
President atana thlan thar Droupadi Murmu chu nimin khan New Delhi-a Parliament Central Hall-ah President atan Chief Justice of India Justice NV Ramana-a'n rinawmna thu tiamtirin a la lut. Lak luhna inkhawmah hian Lok Sabha MP C Lalrosanga leh Rajya Sabha MP K Vanlalvena te an tel. President chhuak ta Ram Nath Kovind, prime minister Narendra Modi, vice president M Venkaiah Naidu leh sorkar laipui leh state sorkara hotute an tel a ni.

Sipai lâk sawiho
October 4-9, 2022 chhungin Rajiv Gandhi Stadium, Aizawlah sipai (Agniveer) lâk rûnpui buatsaih a ni dawn a, hemi chungchangah hian nimin khan Aizawl bawrhsap Dr Lalhriatzuali Ralte kaihhruaiin sorkar hotute'n inbuatsaih dan tur an sawiho. Sipai lâk chungchang hi August thlaah hriattirna chhuah a ni ang a, online emaw form hmangin emaw dilna thehluh theih a ni ang.

Mi pasarih hrem
July 10-16, 2022 chhung khan Mizoramah The Mizoram (Containment & Prevention of the Spread of Covid-19) Act, 2020 bawhchhia mi pasarih hrem an ni a, an pawisa chawi tling khawm chu Rs 700 a ni. Hremte hi Mamit district-a mi vek an ni.

Complaint thehlut
Chawnpui Congress Unit I leh Unit II chuan nimin khan AMC Commissioner hnenah lehkha an thehlut a; Chawnpui Local Council-in hnatlang an koha thawk thei lote tan phatna Rs 200 leh Rs 500 an tuk tih an tarlang. "He thil hi AMC dan ding lai bawhchhiatna chiang tak a nih bakah, mirethei zawkte tana phurrit a ni," tiin, thleng tawh lo se an duh thu AMC-ah an thlen a ni.

Minister-in hawng
Minister R Lalzirliana chuan nimin khan Durtlang Leitan YMA Hall-ah Durtlang Leitan Badminton Club Invitation Championship Tournament a hawng. R Lalzirliana chuan, hlawhtlinna kawng a awlsam lo tih sawiin, "Tun hmaa Mizo lehkhathiam hmasate'n central service exam-te an lo paltlang theih ṭhin chhan chu hrehawm an tuar peih a, an tum a ruh a, an taimâk vang a ni. Infiammite pawhin taimâkna vawng nung reng ang che u," a ti.