Kolasib-ah kawngpui dan tum ; An thil tum sût turin Health Minister-in a ngen

Kolasib NGO Joint Action Committee (JAC) bultumin naktuk zing aṭang hian tiamchin awm loin Kolasib khawpui pawhtu kawngpuite dan tum a ni a, National Highway pawh danchah tum a ni. Health minister Lal Thanzara chuan Kolasib-a NGO-te thil tih tum dan chu mak a tih thu sawiin, inhnûk hniam a, an thil tih tum sût turin a ngen.

Kolasib District Hospital-a surgeon Dr Zothansanga Zadeng, thlaktu awm loa Serchhipa awm tura sorkarin sawn chungchangah, Kolasib MZP chuan transfer order sût turin sorkar an phût a; sorkar kar nan June 1-2 khan Kolasib-a sorkar pisate an lo khârsak tawh a ni.

Doctor transfer order sût a la nih loh avangin June 2, Zirtawpni khan Kolasib NGO Coordination Committee chu YMA Sub-Headquarters, Kolasib hall-ah an ṭhu­khawm a; an hmalakna kal zelah thu lawmawm sorkarin a neih loh avangin chak zawka hma la turin JAC din an rêl.

Inrinni khan Kolasib khawpuia YMA YMA leh MHIP hruaitu te, MZP leh MSU hruaitute leh driver association hrang hrang hruaitute an ṭhukhawm leh a; JAC dinin, an thil phût nawrna atan naktuk, Thawhlehni zing aṭangin Kolasib khawpui luhna kawngpuite chu tiam chin awm loa dan an rêl a ni.

NGO JAC chu nimin khan an ṭhukhawm leh a, thuchhuah siamin, "Kolasib district mipuite’n kan mamawh em em surgeon kan neih chhun Dr Zothansanga Zadeng hi Kolasib aṭanga sawn chhuah engti kawng mahin rem kan ti lo a, June 5, 2017 thlenga tranfer order cancel a nih loh chuan June 6 zing lam dar 5 aṭangin tiam chin awm loin NH-54 danchah tur a ni," an ti.

JAC thuchhuah chuan, kawngpui danchah bakah hian, Kolasib-a zirna-in zawng zawng leh pisa zawng zawng khar an tum thu an puang a; damdawi-ina duty, tui semtu te, kawlphetha lama duty, bawnghnute semte leh chanchinbu mite a huam loh tur thu a tarlang.

Kolasib NGO JAC tarlan danin, Kolasib District Hospital-ah hian surgeon pahnih Dr Zothansanga Zadeng leh NHM hnuaiah Dr Zochampuia an nei. Dr Zochampuia hi damdawi-ina duty tura lâk a ni lo a, super specialist zir tumin entrance exam atan a inbuatsaih mek bakah, sorkarin doctor 26 a lak thar turah interview tura a inbuatsaih avangin chawlh a la mek a ni.

Kawngpui hi hmun hnih - Khuangpuilàm leh Kolasib Tuiṭha Vengahte dan tum nia thu dawn a ni.

Kolasib NGO-te thil phût chungchangah hian Vanglaini palai zawhna chhangin Health minister Lal Thanzara chuan, Kolasib NGO-te chu kawngpui dan leh bandh huaihawt an tum ṭhulh turin a ngen a, "Zoram mipui dinhmun hrethiamin inhnuk hniam turin ka ngen a, an thil phûtah sorkarin remchang kan siamsak dawn a ni," a ti.

Health Minister sawi danin, Lunglei Civil Hospital leh Serchhip Hispital-ah surgeon pakhat ve ve leh Kolasib Hospital-ah surgeon pahnih an awm ṭhin.

Lungleia awm chu na taka a damloh avangin (tunah a thi tawh) Serchhipa surgeon (Lunglei mi) chu Lungleia awm turin dah a ni a, Kolasib-a surgeon pahnih zinga pakhat zawk chu Serchhipa awm tura tih a ni thung. Chuti chuan, Lunglei, Kolasib leh Serchhipah surgeon pakhat ṭheuh an awm thei dawn a ni.

Lal Thanzara chuan, Kolasib-a surgeon pakhat sawn chhuah chu an neih chhun laksak an ni lo tih sawiin, "An neih chhun liau liau chu ni se a hriatthiam theih. An neihchhun a ni lo a, district dang mipuite pawh damlo thei an ni a, surgeon an mamawh ve tho a, kan siam rem a ni," a ti.

Doctor indaih lohna phuhrûk turin sorkarin doctor 26 lak thar a tum mek tih sawiin Lal Thanzara chuan, "Diltu zingah specialist pawh 33 an awm a, surgeon kher an duh pawhin specialist zingah an tel ka ring," a ti.

Doctor lakna kal mek chu June thla chhung ngeia tihfel a nih tur thu leh, Kolasib-a doctor pakhat transfer order chu sût leh mai theih a nih loh thu a sawi bawk.