World Clubfoot Day 2017

Cure Clubfoot Mizo­ram (CCFM) bultumin Inrinni khan Millennium Centre tualah World Clubfoot Day 2017 hman a ni a, parliamentary secretary Joseph Lal­himpuia'n a hmanpui.

Joseph Lalhimpuia chuan, clubfoot (ke-lek) chu mi tam takin an la hriat chian loh vang leh enkawl dam theih a ni tih hre lote an la awm avangin awareness kalpui zel a pawimawh thu a sawi a, "Cure Clubfoot Mizoram hmalakna hi a chhuanawm hle. Mahni mihringpuite phût lêt nei miah loa ṭanpui hi Pathian rawngbawlna leh hna zahawm a ni," a ti.

CCFM chairman Zo­hmingthangi Sailo chuan, Aizawl Civil Hospital leh Lunglei Civil Hospital-ah chawlhkar tin Ningani apiangin Ortho OPD-ah clubfoot clinic hawngin, ponseti method hmanga ke-lekte enkawl ṭhin a nih thu a sawi.

World Clubfoot Day thupui chu 'Khawvel aṭanga ke-lek piansualna ûmbo' tih a nih angin, nausen/ naupang ke-lek nei zawng zawngin enkawlna an dawn a, an dam theih nan theihtawpa hma an lak thu sawiiin Zohmingthangi Sailo chuan, mipuite chu ke-lek nei an hriat chuan lo beng­varpui turin a sáwm a ni.

CCFM financial secre­tary Dr Lalnghakliana tarlan danin, clubfoot neite chu an kephah chhung lamah a inherh a, chumi enkawl dam tur chuan zawi tê têa ke sawngbawl hnuah plaster-a tuam khawng a, pheikhawk hranpa buntir leh tuam zel chuan a dam thei a ni.