Doctor 26 lak turah interview nei mek
Mizoram sorkarin medical officer (doctor) 26 lak thar a tumah Mizoram Public Service Commission (MPSC) chuan tunlai hian personal interview a nei mek a, doctor 150 vel an inlan.
Thu dawn danin, medical officer tur lakna atana interview hi May 29, 2017 khan MPSC pisaah ṭan a ni a, ni tin, sorkar pisa kai ni-ah neih ṭhin a ni. Interview hi June 13-ah emaw zawh theih beisei a ni a, MPSC dan ding lai angin, interview zawh ni-ah result pawh chhuah nghal tura beisei a ni.
Doctor 26 lak tur chungchang hi Health minister Lal Thanzara chuan June 2, Zirtawpni khan Congress Bhavan-a inkhawmah a sawi lang a, doctor 26 lak belh a nih chuan doctor indaih lohna a sutkian a beisei thu sawiin; tun hnaia doctor indaih loh vanga lungawi lohna lantir mekte chu doctor lak belh hun nghâk hrâm hrâm turin a ngen.