Electoral roll Special Drive neih tur sawifiah

Election Commission of India (ECI) chuan thuchhuah siamin, kum 18-21 inkar tana electoral roll-a inthun luh rûnpui, Special Drive neih tur an sawifiah.

ECI tarlan danin, Special Drive kalpui dan tur hi June 1, 2017 khan District Election Officer/DC-te chuan an district ṭheuhah an puangzar tawh a; beihpui hi July 1, 2017 aṭanga ṭan tur niin, July 31-ah zawh a ni ang.

Special Drive-in a tum ber chu, India khua leh tui dik tak, kum 18 tling tawhte hmaih awm loa electoral roll-a thun a ni a, kum 18 leh 21 inkarte ngaih pawimawh bik tur a ni.

Electoral roll aṭanga paih (deletion), siamṭhat ngai siamṭhat (correction), constituency danga insawn leh consitituency chhunga polling station danga insawn (transposition) a tih theih bawk ang.

Dilna form hrang hrang chu khua/veng tina booth level officer (BLO)-te hnen aṭanga lak chhuah leh thehluh theih a ni a; mah­ni awmna district DC, SDO(C) leh BDP office-ahte a ngaihven theih a ni.

Special Drive hi mi tinin hmang ṭangkai a, a ṭul angin mahni chhungte emaw, ṭhiante emaw hrilh chhawng zel turin ECI chuan mipui a ngen a ni.