PWD-in mimal lirthei an hman hawh man Mizoram sorkarin Rs. 2,80,80,000 a bá
Mizoram Public Works Department (PWD) chuan September 2016 aṭanga kumin April 30, thla 20 chhung khan lirthei hman (hire) man Rs. 2,80,80,000 an bá. PWD hian man chawiin mimal lirthei 117 an hmang hawh mek a ni.
PWD-ah hian officer zingah, an hnathawhna atana hman tur lirthei dawng thei si, sorkarin lirthei a pek si loh an awm nual a, executive engineer leh sub-divisional officer (SDO) eng emaw zat chuan hmun hrang hranga hna an thawhna hmuna hman atan mimal lirthei an hmang ṭhin.
RTI Act hmanga zawhna PWD-in an chhan danin, September 2015 aṭanga April 20, 2017 chhung khan mimal lirthei an hman man Rs. 2,80,80,000 an bá a, division enkawltu EE leh sub-division enkawltu SDO-te chuan hna thawhna atan lirthei pakhat zel an hmang (hire) ṭhin a ni.
Hna thawhna atan lirthei man chawia hman phalsak ni mah se, mimal lirthei hman tur erawh an duh ang hmuh loh cháng an neih avangin harsatna an tawh phah ṭhin niin an sawi a; PWD-in lirthei a neih mekte chu a hlui tawh hlawm avang leh superintending engineer (SE) tam takin an bial fannaah harsatna an tawh phah fo niin an sawi bawk.
PWD hotute chuan, an hnathawhna atana hman tur lirthei lei turin sorkarah an thlen fo tawh a, mahse, tun thlengin lirthei leina tur sorkarin a la pe thei lo a; lirthei 21 leina tur sorkarah an dil mek a, chhanna an la hmu lo niin an sawi.
PWD engineer-in-chief R Vanlaltluanga chuan February 16, 2015 khan lirtheia harsatna an tawh dan leh lirthei 17 leina tur Rs. 13,836,208 chu sorkarah a lo thlen. A lehkhaah chuan, EE te, SE leh senior architech-te'n lirthei an dawng tur a nih thu leh, circle pakua leh division 29 an vil thu a tarlang.
PWD E-in-C chuan, lirthei an neih tur ang an neih loh avangin PWD-a driver 157 (regular 68 leh workcharge driver 89) zinga ṭhenkhat chuan lirthei vawn tur an nei lo a, chuvang chuan dak runner, IV grade leh photocopier (xerox machine) enkawltu (operator) atan an hman thute a tel. Mahni hna dik tak thawk lo driver zingah roadroller operator, bulldozer operator, air compressor operator leh JCB operator-te an tel thu a sawi bawk.
PWD E-in-C chuan February 3, 2016 khan Principal Secretary hnenah lirthei leina sum pe turin a thlen leh. March 31, 2015-ah an rawtna GAD-in an pawmpui tawh thu te, Ministry of Road Transport & Highway aṭanga hnathawhna April 2000 aṭanga November 2015 thlenga agency charge 9% tling khawm Rs. 69,57,90,200 sorkara an chhûn luh avangin, lirthei an mamawh leina chu phalsak turin a ngen a ni.
Lirthei an mamawh ang zat lei a harsa a nih chuan, Chief Engineer (Highways), SE (NH Circle-I), SE (NH Circle-II), SE (Multi Modal Project Circle)-te hman tur lirthei pali tal, Rs. 32,31,628 sênga lei tur phalsak turin a ngen bawk.
PWD-in kum hnih chhung, December 2013 aṭanga August 2015 inkara mimal lirthei an hman man an bat dan leh harsatna an tawh dante Vanglaini chanchinbuah tarlan a lo ni tawh. December 2013 aṭanga August 2015 chhunga an bá hi Mizoram sorkar chuan tun hnai khan a rûl a; August 23, 2016 leh August 31, 2016-ah Rs. 2,70,33,300 rûlin, December 14, 2016-ah Rs. 2,75,03,000 a rûl leh a ni.
December 2013 aṭanga August 2015 chhunga lirthei hman hawh man bá pek tlak a nih hnuah, September 2015 aṭanga April 2017 inkar chhungin Rs. 2,80,80,000 an ba leh tawh bawk.
PWD hian man chawiin mimal lirthei 117 an hmang hawh mek a, division hrang hrang 29-a EE pakhat ṭheuh leh SDO pathum ṭheuhin lirthei pakhat ṭheuh an hmang mek.
Lirthei man chawia hmang tur hian sorkar chuan November 7, 2007 khan order a lo chhuah tawh a; PWD-a division 29-a EE leh SDO-te bakah, architech leh senior architech-te'n mimal lirtheite chu an hmang a ni.