MCON building thar hawn a ni

Mizoram College of Nursing (MCON) hostel building thar, Falkawna mi chu Inrinni khan Health minister Lal Thanzara'n a hawng. MCON building hi cheng nuai 1119.64 sênga sak a ni.

Health Minister chuan, MCON din ṭan aṭanga kum 37 hnua an puala hostel building ṭha tak an nei thei chu lawmawm a tih thu sawiin, "MCON-in hostel chang-tlung tak mai an neih hi Health department tan chauh ni loin, Mizoram tana asset ropui tak a ni. Mizoram aṭanga nurse zir chhuak ṭha tak tak kan neihte'n ram pawna an thawhnaah Mizo hming an ti-ṭha ṭhin," a ti.

Lal Thanzara chuan, Mizoram aṭanga nursing zir chhuakte tan ram chhungah leh ram páwnah hna thawh tur a inhawn zelna turin sokarin hma a lak thu a sawi a; in sak leh neih harsatzia hria a, mahni ta anga uluk leh thianghlim taka hostel thar chu luaha enkawl turin MCON zirlai leh thawktute chu a chah.

Khualzahawm, parliamentary secretary Lt.Col. ZS Zuala pawhin thu sawiin, "Nurse-te hi an damlo enkawlte damna an kutah thui tak a innghat a, hmangaihna leh lainatna nen damlote enkawl ṭhin a pawimawh," a ti.

Hostel building hi block-I leh block-II ah ṭhen a ni a, chhawng nga ve ve niin, a pumpuiah zirlaite pindan tur 80 a awm a, khum 160 leng tura ruahman a ni.

MCON hi kum 1980-ah din a ni a, tun dinhmunah B.Sc (Nursing) zirlai 118 an nei a ni.

Health Minister hian Referral Hospital, Falkawn a tlawh nghal a, thawktute'n an mamawh hrang hrang an lo thlente chu a theih ang anga ngaihtuah a tum thu a sawi.