IAS atana interview turin mi panga ko

State civil service ni lo, service dang aṭanga Indian Administrative Service (IAS)-a lut turin Mizoram sorkara officer panga chu Union Public Service Commission-ah personal interview tura koh an ni a; New Delhi-a UPSC pisaah interview an nei dawn a, an zinga pakhat a tling ang.

Thu dawn danin, interview tura kohte hi Power & Electricity department-a senior executive engineer Benjamin L Tlumtea (MES), Finance department-a deputy secretary Laldinpuia (MFAS), Sakawrdai damdawi-ina medical officer Dr Vanlalrengpuia, Agriculture deputy director C Lalnithanga leh Central Jail-a medical officer Dr Lalhriatzuali Ralte te an ni.

State sorkara service dang aṭanga IAS-a lut tur hian Mizoramin post pahnih a nei a, post chelhtu zinga pakhat K Lalnghinglova chu tun hnaiah a pension avangin a hmun ruak hnawhkhat turin DPAR (Civil Services Wing) chuan advertisement a tichhuak.

Diltu zinga officer 31 chu interview tura koh an ni a, UPSC leh DPAR ṭangkawpin May 30-31, 2017 khan Chief Secretary video conferencing room-ah interview neihpui an ni a; final selection hmachhawn turin mi panga thlan an ni ta a ni.

Non state civil service aṭanga IAS kai tur hian group-A officer kum riat thawk tling chin, kum 56 aia upa lo tan dil theih a ni. Mizoramin post pahnih a neih zinga pakhat chu Dr Lalrozama'n a luah mek a ni.