Serchhipin doctor thar neih an nghakhlel

Serchhip district Joint Action Committee (JAC) chuan thuchhuah siamin, Kolasib District Hospital aṭanga Serchhip District Hospital-a awm tura tih, Dr Zothansanga Zadeng-in Serchhipah a hna a zawm hun an nghahhlelh thu an tarlang a, a zawm thuai theih nana hma la turin sorkar an ngen.

Serchhip district JAC tarlan danin, Lunglei Civil Hospital-a thawk lai Dr Lalrochunga Tlangte, surgeon a thih avangin doctor awmna siam rem nan Serchhip District Hospital-a thawk Dr Lalrinmuani chu Lungleiah sawn a ni a; Serchhipa awm turin Kolasib-a awm mek surgeon pahnih zinga pakhat Dr Zothan-sanga Zadeng chu tih a ni.

Surgeon sawn kual chungchangah MZP headquarters, Serchhip-in thuchhuah an siam tawh bakah, YMA sub-headquarters, Serchhip pawhin Dr Zothansanga Zadeng chu ṭha taka a chhuah remti turin MZP headquarters, Kolasib hnenah ngenna an pe tawh niin an tarlang.

Serchhip JAC chuan, ‘Sem sem dam dam’ tih rilru pua Serchhip, Lunglei leh Kolasib-ahte surgeon pakhat diat diata an awm theih thu an sawi a, "Kolasib-ah MZP-te'n pahnih neih duh a, phungbawma NGO dangte sawm a, JAC dina hetia na taka kal an tum hi pawi kan tiin, kan dem tak meuh a. He thil hi Lunglei leh Serchhip district mipui tan pawh thih leh dam kar thil khawih phak a ni tih hre tel ve se kan duh a ni," an ti.

Serchhip JAC chuan, doctor siam rem tura Mizoram sorkar hmalak tum dan chu thil tih âwm taka an ngaih thu sawiin, Dr Zothansanga Zadeng chu Serchhipah a hna a zawm ngei theih nan a ṭul anga hma lak an tum thu an puang. Serchhip JAC-ah hian YMA, MUP, MZP leh Serchhip Town Development Committee aiawhte an tel a ni.