Thingsulthliahah zirlai chawimawi

Thingsulthliah Teachers Association (TTA) chuan June 2, 2017 khan an khaw community hall-ah kumin HSLC leh HSSLC-a zirlai pass tharte lawmpuina hun an buatsaih a, bialtu MLA R Lalzirliana'n a hmanpui.

Inkhawm hi Thingsulthliah Teachers Association president VL Hmunluahpuia'n a kaihruai. R Lalzirliana chuan, zirlaite chu tuna an hlawhtlinna chu an bul ṭanna tur chauh a ni tih hria a, inthununna, thuawihna leh taimakna nena zir zel turin a fuih a, "Zo ze mawi tel lo thiamna hi thil hlauhawm tak a ni. Khawi hmunah pawh awm ila, Mizo kan nihnaah chiang tlatin, Mizo nun ze mawi i chawi nung zel ang u," a ti.

Kumin HSLC result-ah Thingsulthliah khuaa high school pathum aṭangin zirlai exam beitu 73 zinga 64 (84.9%) an pass a, HSSLC-ah zirlai 38 zinga 35 (92.1%) an pass bawk.