Tlabungah petrol pump dah a nih theih nan hma la turin Union Minister ngen

West Tuipui bialtu MLA Nihar Kanti Chakma chuan June 2, 2017 khan sorkar laipuia Petroleum and Natural Gas minister Dharmendra Pradhan hnenah lehkha a thawn a, Tlabungah petrol filling station bun thuai a nih theih nana hma la turin a ngên.

NK Chakma chuan, Tlabung chu Mizoram mai ni lo, India ram tan a pawimawh hle tih ziakin, "Sorkar laipui hmalaknain Tlabung Sub-Division chhung-a Bangladesh nena inrinaah km. 200 aia thui ramri hung hna thawh mek a ni," a ti a; Tlabung Sub-Division huam chhungah khaw 92 leh mi 60,000 an chên mek thu leh, ramri véngtu sipai awmna hmun a nih thu a tarlang.

Tlabung aṭanga teha km. 120 huam chhungah petrol pump a awm loh thu sawiin NK Chakma chuan, chu vang chuan mipuiin harsatna an tawh phah thu a sawi a, Tlabungah petrol pump bun thuai a nih theih nan IOC hotute nawrpui turin a ngen a ni.