Sum enkawl dan hriat loh vangin Harsatna kan tâwk ṭhin - Chief Secretary

Reserve Bank of India (RBI) chuan nimin khan Hotel Regency-ah Financial Literacy Week an hmang ṭan. A hawnnaa khuallian, chief secretary Lalmalsawma chuan, sum leh pai enkawl dan dik hriat tâwk loh avangin Mizo mipuite'n harsatna an tawh ṭhin thu a sawi.

Chief Secretary chuan, Mizoram chu lehkhathiam tamna ni mah se, financial literacy-ah chuan India state-te zinga hniam ber dawt a nih thu a sawi a, "Sum leh pai enkawl dan dik kan hriat tâwk loh avang leh, hemi kawnga kan hriatna a la hniam avangin ‘chiahpuam’ avangin mipui zingah sum hloh eng emaw zat kum kal tawh lamah an awm tawh," a ti a, sum leh pai chungchanga hriatna a zauh poh leh mipui an him thu a sawi.

Sum leh pai enkawl thiam tura RBI hmalakna chu bank tin ten tha taka an ṭawiawm a beisei thu sawiim Lalmalsawma chuan, "Kumin literacy week atan a thupui thlan hrang hrangte hi sorkar laipui hmalakna nente pawh inzul tak a nih avangin a hlawhtlin ngei ka beisei," a ti.

Financial Literacy Week hawnna inkhawmah hian NABARD Regional Office-a chief general manager RK Srivastava pawhin thu a sawi. Week hi June 9 thleng hman a ni ang.

Mipuiin sum leh pai enkawl dan dik an hriatthiam a, an tana ṭha tur leh ṭha lo turte an thliar thiam theih nante RBI chuan nikum 2016 khan Financial Literacy Week hi India ram pumah kum tin neih thin turin a ruahman a ni.

Sum leh pai enkawl chungchang inzirtirna (financial literacy) hmalaknain a tum pali te chu - sum khâwl leh pûk chungchang inzirtir, sum leh pai hman dan tur ruahmanna fel tak siam, mipuite dikna humhim leh, khawvel hmasawnnain a ken tel ‘going digital’ inzirtirte a ni.

Week thil tum pali behchhan hian kumin Financial Literacy Week thupui chu, 'Know your customer, exercising credit discipline, grievance redressal leh going digital' tih a ni.