Thing phunte enkawl zui a pawimawh - CM

State Level Commi­ttee on Green Mizoram chuan, nimin khan Chief Minister's Office conference hall-ah Green Mizoram Day hman dan tur an rel. Meeting kaihruaitu, chief minister Lal Thanhawla chuan, thing phunte an dam khawchhuahna atan enkawl zui a pawimawh thu a sawi.

Chief Minister chuan sum, thâ leh hun sénga kum tak tak kal ta aṭanga Green Mizoram Day-a thing leh a ṭiak phunte chu an puitlin theih nan a enkawl zuina lam ngaihtuah leh ngaih pawimawh a ṭul thu a sawi a, "Chu mai bakah, ṭhangtharte hnenah thing phun pawimawhziate zirtirna lamah ṭan lak a ngai," a ti.

Ramngaw leh nung­cha hrang hrang, biodi­versity an tih mai chu Mizoramin a la neih ṭhat thu sawiin CM Hawla chuan, "Hengte leh thing phunte hi inzawm vek an ni a, biodiversity humhalh turin thing phun leh ramngaw siam a pawimawh," a ti a; tuihna kang chat mek siamṭhatna atan te, sik leh sa inthlak tihziaawm nante leh lei hnuai tui chiah chin tihsan nante thing phunin awmze thui tak an neih thu a sawi.

Meeting-ah hian PCCF Lalram Thanga'n Green Mizoram Day 2017 hman dan tur ruahmanna duan lâwkte a pharh a; sawiho a nih hnuah Green Mizoram Day hman dan turah thutlukna siam a ni.