Mizorama doctor-te training neihpui

Mizoram sorkara Health department, All India Institute of Medical Sciences (AIIMS), New Delhi, Centre for Chronic Disease Control (CCDC), New Delhi leh Public Health Foundation of India (PHFI), New Delhi-te bultumin PHFI chuan Mizorama sorkar hnuaia doctor-te tan training an buatsaih ṭhin dawn a; nimin khan ṭan niin, a ṭanna hun hi Rajya Sabha MP Ronald Sapa Tlau-in a hawng.

Training neih tur chung­chang hi nimin khan IPR Conference Hall-ah thuthar thehdarhtute an hrilhfiah a;

PHFI-a an hotu pakhat, Dr Priscilla C Ngaihte chuan, PHFI-in Healthy North East an kalpui a, chutah chuan programme hrang hrang an nei tih a sawi a, "Doctor-te certi­ficate course training kan pe ṭhin a, Mizoramah chuan doctor 20 vel zelin trai­ning kan pe dawn a ni," a ti.

Priscilla Ngaihte chuan, hmarchhak state-te'n mamawh chi hrang hrang, inang lo tak tak an neih thu sawiin, "Mizoramah chuan cancer a tam a, cancer a tlem theih nan hmalak kan tum," a ti a; Mizoram Health department-te nen an thawhho theih avangin lawmawm a tih thu a sawi.

MP Ronald Sapa Tlau chuan, natna inkai chhawn theih loh, ei leh in leh nunphung aṭanga natna neih chi tam tak a awm thu sawiin, "Eng nge kan ei tih ka hriat chian a ngai a, chaw hrisel ei a pawimawh," a ti.

NHM mission director Dr Lalrozama chuan, National Health Mission hnuaiah programme 30 vel a awm thu a sawi a, mipui hriselna atan NHM-in theihtawp a chhuah dawn thu a sawi.

NCD state nodal officer Dr Eric Zomawia pawhin, training-ah hian Mizorama doctor-te a tam thei ang teltir tum a nih thu a sawi a; natna inkai chhawn theih loh, non-communicable disease (NCD) a tlam theih nan ṭanhopuiah media-te leh mipui a sawm a ni.

Dr Eric Zomawia tar­lan danin, NCD lama hma la turin sorkar laipuiin kum 2010-ah National Program for Prevention and Control of Cancer, Diabetes, Cardio-Vascular Diseases & Stroke (NPCDCS) a din a; a tirah India rama district 100-ah din phawi niin, April 2015-ah chuan district 364-ah din a ni tawh a, kuminah chuan district 616-ah din hman tum a ni. Mizoramah chuan district tin (8)-ah din a ni tawh.