Vawiin aṭangin Kolasib-ah kawngpui dan an tum ; Rorel lai party-in kawng dan ṭhulh turin an ngen

Kolasib Joint Action Committee chuan, nimin khan Kolasib Press Club-ah thuthar thehdarhtute kâwmin, Kolasib District Hospital-a doctor pakhat Serchhipa awm tura tih a nih avangin vawiin zing aṭangin Kolasib-ah kawngpui an dahchah dawn thu an puang nawn.

Hetih lai hian, Congress party chuan Kolasib mipuite chu an thil tum ṭhulh turin an ngen.

Kolasib JAC thuchhuak

Kolasib JAC hruaitute chuan, Kolasib Hospital-ah kum 2008 aṭangin surgeon doctor mumal an nei lo niin an sawi.

An sawi danin, surgeon an neihte chu a rualin kum 2008-ah sawn chhuah an ni a, July 2013-ah surgeon dang Dr John Lalliandinga dah a ni. Dr John-a chu August 12, 2013-ah super specialist zirin a awm bo nghal a, August 2016-a super specialist a zawh hnuah Kolasib-ah awm zui loin, Aizawl Civil Hospital-ah sawn a ni.

Tuna sorkarin Serchhipa sawn a tum surgeon Dr Zothansanga Zadeng chu March 5, 2015-ah Kolasib-ah a awm ṭan a, NHM hnuaiah February 2017 aṭangin surgeon dang Dr Zochampuia a awm bawk. Dr Zochampuia hi NHM hnuaia Elderly Scheme-a thawk tura lak a nih avangin damdawi-ina duty tur a ni lo a, zai ngai pawh awm se, zai tura thutlukna siam thei a ni lo niin an tarlang.

Kolasib JAC hruaitute chuan, Kolasib Hospital-ah surgeon pahnih - Dr Zothansanga Zadeng leh Dr Zochampuia te an awm anga a ngai a nih chuan, NHM hnuaia thawk zawk Dr Zochampuia chu sawn chhuak zawk se an duh thu an sawi. Dr Zochampuia chu training-in hmun danga kal mai tur niin an sawi bawk.

Serchhip mipuite ep an duh lo tih sawiin JAC hruaitute chuan, "Social media hrang hrangah inti hre tak takte'n Serchhip district mipuite harsatna siam tum hrim hrim anga thu an thehdarh hi ṭha kan ti lo a, thu bulbâl hre loa hetiang zawnga thu lo vawrh darh hi kan do tlat a ni," an ti.

Kolasib JAC-te chuan Mizoram sorkar chu Kolasib District Hospital ngaihthahah an puh bawk a, "Kum 10 kal taah khum 100 awm theihna turin ruahmanna siam a ni tawh a, tun thlengin bawhzui a la ni lo," an ti a; sorkar laipuia programme awm aṭangin eng eng emaw sak belha thuam ni ṭhin mah se, Mizoram sorkar aṭangin hmalakna a awm lo nia an hriat thu an sawi.

Congress party ngenna

Rorel lai Congress party-a Media department hotute pawhin nimin khan Aizawl Press Club-ah thuthar thehdarhtute an kâwm a; Kolasib mipuite chu lungawi lohna lantira kawngpui dan an tum chu ṭhulh turin an ngen.

MPCC Media department chair­man James Thanghmingmawia chuan, Lunglei Civil Hospital-a surgeon awm chhun Dr T Lalro­chunga chu hna thawk thei a nih tawh loh hnuah a thlaktu atan Serchhip Hospital-a surgeon Dr Lalrinmuani, Lunglei khaw mi chu Lungleiah sawn a ni tih a sawi a, "Kolasib-a surgeon doctor pahnih Dr Zothansanga Zadeng leh Dr Zochampuia te

aṭangin Dr Zothansanga Zadeng hi Serchhipa surgeon awm chhun ni turin sawn a ni," a ti.

James Thanghmingmawia chuan, Mizoram pumah doctor indaih lohna a nasa tih sawiin, "PHC leh CHC chu sawi loh, district hospital-ah pawh doctor indaih lohna a nasa hle. Surgeon doctor pawh nei lo district pahnih dang an la awm a, district tinah surgeon doctor an neih kim theihna turin sorkarin hma a la mek a ni," a ti a; Aizawl Civil Hospital-ah surgeon pathum an awm a, zai tur an tam avangin an indaih lo hle niin an sawi.

Congress party chuan, doctor indaih lohna phuhrûk turin sorkarin doctor 26 lak a tum mek a, MPSC-in interview a kalpui mek tih sawiin, "June 13-ah interview zawh beisei a ni a, engkim peih hman tura chak taka kalpui mek a ni," an ti a; doctor lak belh hun chu nghak turin Kolasib mipui an ngen a ni.

MPCC Media department sec­retary David M Thangliana chuan, Kolasib-a surgeon pakhat zawk, Dr Zochampuia'n super specialist zir a tum nia sawi chungchangah Dr Zochampuia chu an biak thu sawiin, inbuatsaih nan leh tuna doctor 26 lak tura interview turin May thla khan ni 20 chhung chawlh a lak thu a sawi a, "June 1 khan Kolasib-ah a hna a zawm leh tawh," a ti.

David M Thangliana chuan, Dr Zochampuia chuan super specialist a zir ngei dawn tih hriat a nih loh thu te, entrance exam hmachhawn tum mai a nih thu te, sorkarin a phalsak a la ngaih thute a sawi niin a sawi bawk.