Doctor-te'n lungawi lohna an lantir dawn

Indian Medical Association (IMA) chuan vawiin hian India ram pumah lungawi lohna an lantir dawn a; IMA Mizoram State Branch pawhin an zawm ve dawn a, vawiin chawhma dar 9-11 chhung pen down strike an nei dawn.

Lungawi lohna lantir tur chungchangah hian IMA Mizoram Branch hruaitute chuan nimin khan Aizawl Press Club-ah thuthar thehdarhtute an kâwm a; an president Dr Vanlalruata chuan, India ramah kawng hrang hrangin doctor-te nêkchepna leh an chunga hleilenna a zual tial tial tih sawiin, "Doctor laka damlo chhungte hleilenna leh kut-thlakna a awm tawh loh nan sorkar laipuiah ngenna siam ṭhin a ni a, mahse, a sâwt hlei thei lo," a ti.

IMA Mizoram hruaitute sawi danin, IMA hian vawiin hian lungawi lohna an lantir dawn a; New Delhi-ah chuan 'Dilli Chalo' movement huaihawt a ni dawn.

State tina IMA branch-te pawh Dilli Chalo-ah hian tel turin an hriattir a, Mizoram branch aṭang pawhin tel turin hruaitu ṭhenkhat an kal a ni. Zing dar 6-8 chhung Protest Match an nei dawng. Dilli Chalo bakah hian, state tinah lungawi lohna lantir tura tih a ni bawk.

Lungawi loh lantir nan hian Mizoramah chuan vawiin chawhma dar 9-11 chhungin pen down strike neih a ni dawn. Pen down strike hun chhung hian damdawi-in OPD-te hawn a nih pawhin damlo an en dawn lo. Strike hian emergency erawh a huam lo ang.

IMA-in lungawi lohna a lantir chhante
1. Doctor-te’n damlo chhungte kut an tuar ṭhin a reh theih nan doctor-te venhimna tur dan khauh tak siam an phût.
2. Sorkar laipuiiin National Medical Commission (NMC) din a tum an duh lo a, NMC din loin, Indian Medical Council (IMC) Act siamṭhat an phût.
3. MBBS zir zo tawhte'n doctor hna an thawh theihna tur practice licence an neih theih nana exam hranpa, National Exit Exam (NEXT) buatsaih tura sorkar laipuiin rawtna a siam chu an duh lo. Hei hi medical doctor-te rahbehnaah an ngai.
4. 'Doctor-te hi mihring famkim lo an ni a, tihsual palh nei thei an ni. Chuti chung chuan clerical error vang mai mai pawhin criminal code angin doctor-te charge theihna dan siam a ni hi kan duh lo a, tihdanglam ni rawh se,' an ti.
5. Sorkar laipuiin MBBS emaw, BDS emaw ni lo, doctor dangte (AYUSH, etc.) damdawi chawh phalna pek a tum niin an sawi a, chu chu an duh lo.
6. Doctor-te’n an damlote tana damdawi an chawhnaa damdawi hming ziah danah sorkarin kaihhruaina siam a tum hi (entirna - capital letter chauha ziak tur, etc.) ṭha lo an ti.
7. Amendment in Clinical Establishment (Registration and Regulation) Act 2010 hnuaiah doctor mal leh clinical establishment tênau (private clinic/nursing home, etc)-te thlenga huamtir chu siamṭhat an duh.