Special Drive neih tur sawifiah

Aizawl DC Kannan Gopinathan chuan nimin khan DC conference hall-ah thuthar thehdarhtute a kâwm a; electoral roll-a kum 18-21 thun beihpui thlakna, Special Drive neih tur a sawifiah.

Aizawl DC tarlan danin, Special Drive hi July 2017 chhunga neih tur a ni a, kum 18-21 inkar, electoral roll-a la awm lote tan inthun theih a nih bakah, mitthi tawh electoral roll-a hming la chuang site hming paih tur a ni.

Special Drive chhung hian booth level officer (BLO)-te'n an bial chhung-a vote nei thei, electoral roll-a la awm lote zawng chhuak turin form kengin a fang kual dawn a; polling station tinah July 8-22 chhung Special Camp huaihawt tur a ni bawk.

Polling Station tinah hian BLO-te form lo dawng turin leh dilna thelut duhte lo pui turin an ṭhu dawn a; BLO hnen aṭang hian electoral roll-a hming awm leh awm loh en theih nghal a ni ang.