Duhoma’n CAG kal-phung thlak ṭul a ti

ZNP president Lal-duhoma chuan, Comptroller and Auditor General (CAG) report kalphung chu thlak a ngai nia a hriat thu a sawi.

Lalduhoma hian nimina an party pisaa inkhawmah thu sawiin, CAG report hnuhnung ber, May 2017-a Assembly House-a pharh chuan March 31, 2016 thleng a huam tih sawiin, “Thu hlui tak tak, kum tam tak liam tawh thilte tam tak a awm. A up-to-date loh ṭhin em avang hian a hun laia khawihtu official-te kha an lo kaisang emaw, an transfer emaw, an pension emaw, an thi tawh emaw a lo ni nual tawh ṭhin. System hi thlak a nih loh chuan a ṭangkai tur angin a ṭangkai thei thin lo a ni,” a ti.

ZNP President chuan, CAG-a auditor-te chu department hotute’n an lo tihlâwm chuan object tur an nei tlem a, an lawm loh chuan object tur an ngah thei hle niin a sawi a, “CAG report-in objection a siamte hi department-te’n an chháng a, sawifel an tum ṭhin a, tam tak chu an sawifel leh ṭhin,” a ti.

Doctor indaih loh chungchangah Lalduhoma chuan, khua leh khua, bial leh bial inkarah boruak ṭha lo a piang ang tih a hlauhawm ta hial niin a sawi a, “Serchhip-in surgeon an nei lo hi pawi kan tihpui a, CM bial a ni bawk a, Kolasib-in surgeon pakhat an neihchhun chhuhsak kher loa Serchhip ta tur hi dap hmu vat turin sorkar kan ngen a ni,” a ti.