Mipuia hmai phih fai tumah NIB puh

MNF party chuan thuchhuah siamin, NLUP chungchanga NLUP Implementing Board (NIB) insawifiahna chu mipui laka hmai phihfai tumna chauha an ngaih thu an tarlang.

MNF chuan, NIB-in Comptroller Auditor General of India (CAG) report-in NLUP chungchang a tarlante sawifiah a, NLUP chu a hlawhtlinga an ngaih thu an tarlang chu zahthlak an tih thu an sawi a, "NIB chuan CAG report-in 'NLUP-in a thil tum hlawhtling lo anga puhna chungchangah thu dik tâwk lo a awm nia lang' an tih kha MNF chuan zahthlak a ti hle a ni," an ti.

CAG chu India rama state/UT leh Central-in pawisa a hman, sum leh pai hman dan a dik leh dik loh endiktu a ni tih sawiin MNF chuan, "CAG report-ah hian pawisa hman dik leh dik loh chu chiang taka tarlan a ni mai ṭhin. CAG report reng reng hi state sorkarin a hnial kalh ngai lo a, an tih dik lohna lai ngaihtuahin an siamṭha mai tur a ni zawk," an ti a; NIB chu CAG report-a an lungawi lohna CAG leh sorkar laipuiah thlen ngam si lo a, Mizo mipui hmaa hmai phihfai tumah an puh.

CAG report chu an pawm lo a, a dik lo tak takah a ngai a nih chuan, Mizo mipui hmaa insawifiah loin, sorkar lai-puiah dik lo an tihna laite thlen ngei turin MNF chuan NIB an chah a ni.