Dr BD Chakma chungchang Speaker-in a la ngaihtuah lo

Assembly speaker Lalrinliana Sailo chuan, eiruk thubuaia Court-in thiam loh a chantir leh jail-a táng tura a tih Dr BD Chakma, Tuichawng bialtu MLA chu MLA aṭanga bàn a nih dawn leh dawn loh a la ngaihtuah lo.

Vanglaini palai zawhna chhangin Assembly Speaker chuan, Dr BD Chakma thiam loh chantir a nih chungchang chu official-in a la dawn loh thu a sawi a, "Media aṭang chiahin chanchin ka la hria. Hma ka la dawn a nih chuan official-in report ka dawn a ngai. Chumi hma chuan hma ka lo la ngawt thei lo," a ti.

Lalrinliana Sailo chuan, official-in hriattirna a dawng a nih chuan uluk taka a ngaihtuah tur thu sawiin, "Dan hre mite ráwn chungin official-te nen kan zir chiang ang," a ti a; Parliament leh state dang kal tawh dante pawh an zir tur thu a sawi a ni.