Vawk suat zangnadawmna pek tur AH&Vety Minister-in a tlangzarh

Vawk pûl hri, African Swine Fever avanga kum 2021-a vawk suat neitu chhungkaw 2,488 hnena zángnadawmna sum pek tur chu Animal Husbandry & Veterinary minister Dr K Beichhua'n Vety Polyclinic Hospital conference hall-ah nimin khan a tlangzarh.

Vawk suat zángnadawmna hi vawk pakhatah kg. 15 hnuai lamah Rs 2,200, kg. 15-40 inkarah Rs 5,800, kg. 40-70 inkarah Rs 8,400, kg 70-100 inkarah Rs 12,000 leh kg 100 aia ritah Rs 15,000 a ni a; vawk chaw an dah khawl pawh tihchhiat vek tur a nih avangin vawk chawah zángnadawmna kg. khat zelah Rs 22 ruahman a ni.

Vawk suat zat chu kg. 15 hnuai lam 2,312, kg. 15-40 inkar 3,256, kg. 40-70 inkar 2,775, kg. 70-100 inkar 1,938 leh kg. 100 chung lam 2,287 a ni a, a vaiin vawk 12,568 niin, a neitute chu mi 2,488 an ni. Vawk neitute hnena zángnadawmna pek tur zawng zawng chu Rs 10,48,42,200 a ni a, an bank account-ah thun a ni ang.

AH&Vety Minister chuan, ASF vanga vawk thi neitu zawng zawng zángnadawmna pek an duh thu sawiin, "Sorkar laipuiin inkaihhruaina a neih sa ang baka kal a theih loh avangin AH&Vety department hriatpuinaa vawk suatte chauh zángnadawmna kan pe thei a ni, Mizoram hi vawk suat avanga sorkar laipuiin a scheme neihsa aṭanga India rama zangnadawmna a pek awm chhun a ni," a ti. 

Dr K Beichhua chuan, ASF vanga vawk thi neitute hnena zángnadawmna pek tur pawh Planning department kaltlangin an bawhzui nia sawiin, "Chief minister Pu Zoramthanga’n prime minister Narendra Modi hnenah PM’s Special Package anga pe turin lehkha a thawn tawh," a ti a; zangnadawmna tura Mizoram sorkarin sum a tum ve tur (50%) petu Chief Minister chungah an lawmthu a sawi.

Mizote'n vawk sa an ei zinga a tam zawk chu ram páwn aṭanga lak luh a nih thu sawiin K Beichhua chuan, "Ram páwn aṭanga vawk lak luhte hian vawk natna chi hrang hrang an ken tel ṭhin avang leh ram chhunga thar ngei vawk saa kan intodelh theih nan kum 2019 aṭang khan ram páwn aṭanga vawk lak luh khap a ni tawh," a ti a; vawk hri laka invenna tura sorkar thuchhuahte zâwm turin mipui a chah. Zangnadawmna tlangzarhna inkhawmah hian AH&Vety, Fisheries and Sericulture Board vice chairman C Lalmuanpuia, MLA pawhin thu a sawi.