DMR minister Lalchamliana'n Republic Venga lei chêtna a tlawh

27th July, 2022

Disaster Management & Rehabilitation (DMR) minister Lalchamliana chuan nimin khan Republic Venga Kela Road chung, Lungli tuikhur thlanga lei chê/tawlhna a tlawh a, chhiatna thleng mipuiin an tawrh dan a enfiah.

Khawtlang hruaitute nen an inkawmnaah DMR Minister chuan, Republic Venga leimin avanga chhiat tâwk chhungkua tam tak an awm chu pawi a tih thu leh vanduaina tâwkte thinlung taka a tawrhpui thu a sawi a, "Harsatna a lo thlen hian Mizo nih a nuam ṭhin. YMA-te kan thlamuanpui a, kan chhuang a ni," a ti.

Lalchamliana chuan, chhiatrupna a thlen thulha DMR aṭanga ṭanpuina awm theite ngaihven nghal a nih thu sawiin, "Sorkar laipuiin inkaihhruaina a siam angin ṭanpuina pek a ni ang," a ti a; in chhia leh in ṭhiah ṭanpuina tur zat a hrana bituk a nih thu a sawi.

DMR Minister hian Local Disaster Management Committee, Republic Veng hnenah ṭanpuina Rs 50,000 leh relief camp-a awmte mamawh lei nan ni thum chhung atan Rs 17,760 a hlân a, YMA hnenah hnatlangte ei leh in senso atan Rs 10,000 a pe bawk.

Minister ṭawiawmtu Aizawl DC Dr Lalhriatzuali Ralte chuan, Aizawl District Disaster Management Authority aṭanga hmalak theihte chak taka bawhzui a ni dawn tih a sawi a, "Fûr ruahtui a tam hmaa kan him tlànna tura mipui hnena hriattirna leh ngenna chhuah tawhte ngai pawimawh thar leh ṭheuh i tum ang u. Chhung tinte'n tui chhe paihna leh tui luankawrte an vil ṭhat hle a ngai a ni," a ti.

Nimin vêk khan Republic Veng lei chêtna hmun hi bialtu MLA C Lalsawivunga, Aizawl mayor Lalrinenga Sailo, DMR secretary K Lalrinzuali leh sorkar hotu dangte pawhin an tlawh a; C Lalsawivunga hian Rs 5,000 leh Mayor-in Rs 5,000 leh tarpauline bundle khat an pe a ni.

Republic Veng hian an veng leh veng danga mimal leh pawl hrang hrang aṭangin ṭanpuina eng emaw zat an dawng tawh bawk.

Tarlan tawh angin, Republic Vengah hian lei chê vangin in pakuaa chhungkaw 17 an inthiar chhuak a, in pariata chhungkaw 19 an riak chhuak rih bawk. Inthiar chhuak leh riak chhuak zawng zawng chu in 17-a chhungkaw 36 an ni a, mihring cheng zat chu 146 an ni.