By-election draft electoral roll tlangzarh

Nimin khan district hrang hranga village council by-election neih tura electoral roll hman tur ennawnna atan draft electoral roll-te tlangzarh a ni.

Aizawl DC Dr Lalhriatzuali Ralte chuan village council leh local council by-election atana inbuatsaih nan draft electoral roll a tlangzarh a; by-election neihna turte chu - Leitan Ramthar, Zemabawk South, Ramthar North, Electric Veng, Tlungvel, Falkawn leh Vaitinte a ni.

Leitan Ramthar hi Durtlang Leitan LC aṭanga indang thar a ni a, Zemabawk South pawh Zemabawk LC aṭanga indang thar a ni. Khua/veng dangte erawh chu VC/LC member thihna vanga seat ruak a ni thung.

Lunglei bawrhsap Kulothungan A pawhin Tipperaghat VC by-election neih tur atan draft electoral roll chu DC Conference Hall-ah a tlangzarh. By-election hi VC member pakhat a thih vanga neih tur a ni.

Siaha DC Lalsangliana chuan an district-a VC pariata by-election atan draft roll a tlangzarh. By-election neihna turte chu Siaha New Colony-IV, College Vaih-III, New Colony-V, New Siaha West-II, Siaha Vaihpi Bazar, Lobo-I, Iana-II leh Supha-te a ni.

Champhai Dinthar VC by-election atan Champhai election officer Lalnunfela Chawngthu-in DC Conference Hall-ah draft electoral rolls a tlangzarh a; Kolasib district-a VC pathum - Bairabi North, Kolasib Venglai leh Zanlawn VC by-election neih tura inbuatsaih nan bawrhsap John LT Sanga'n draft electoral roll a tlangzarh.

Serchhip bawrhsap Nazuk Kumar pawhin nimin khan DC Meeting Hall-ah VC by-election draft electoral roll a tlangzarh. By-election neihna tur chu Baktawng a ni a, Baktawng VC hian Buhkangkâwn a huam tel a ni.

Lawngtlai district-a VC panga - Ngengpuikai, Dumzautlang, Va­ṭhuampui Hmawng­buchhuah leh Laitlang khuaa by-election atan Lawngtlai bawrhsap Amol Srivastava chuan Lawngtlai DC Conference Hall-ah draft electoral roll a tlangzarh a; draft electoral roll chu political party aiawhte hnenah a hlàn.

Mamit district-a Phulpui West leh Rajiv Nagar khuaa VC by-election neih tura inbuatsaih nan draft roll chu assistant district election officer Lalhmachhuana'n DC Conference Hall-ah a tlangzarh a; Khawzawl district-a Sialhawk leh Aiduzawl khuaa VC by-election neih turah nimin khan Khawzawlah draft roll tlangzarh a ni bawk.