Thu thar rintlak hriatna atan chanchinbu leh TV news-te a ṭha ber - Robert Romawia

T Romana College (TRC) chuan nimin khan Vanapa Hall-ah zirlai tharte lawmna leh zirlai zoa chhuak turte thlahna, Freshers’ Social cum Graduation Day an hmang a, khuallian Robert Romawia Royte, minister of state chuan, thu thar rintlak hriatna atan chanchinbu leh TV chanchin tharte a la ṭhat ber thu a sawi.

Robert Romawia Royte chuan social media-in khawvel a tihdanglam nasat thu sawiin, "Social media hi a ṭangkai em em rualin, thil belhchian dâwl lo leh rintlak loh a tam a, thu thar rintlak hriatna atan chanchinbute leh TV news hi a la ṭha ber a ni," a ti.

Graduate tharte chu a lawmpui thu sawiin Minister chuan, "In nunah bung thar in kai dawn a, tam tak tan chuan zirna kawng in zawh tàwpna a ni dawn. Exam hrang hrang atan in inbuatsaih chho ang a, he khawvel hmachhawn turin thliarkar rilru zím tê pu loin, rilru zau leh changkang put a ṭul hle dawn a ni," a ti a; a êng zawnga thlir leh thawhrim a pawimawh thu a sawi.

Robert Romawia chuan, college rap ṭana zirna sang zawk atana bul ṭan thartute fuihin, "Bul ṭanna ṭhain a tàwpna ṭha a hril thei a, in zirnaah te, ṭhian inkawmnaahte leh ngaihtuahna in siamnaahte a bul ṭan uluk turin ka chah che u a ni," a ti a; zirlaite'n hna ruakte an hriat a, dil nacháng an hriat theih nan central leh state-a hnaruak awmte college notice board-ah tár ṭhin turin TRC Principal leh zirtirtute a chah.

Minister hian TRC magazine ‘Raltiang’ a tlangzarh a, zirlai ti ṭhate hnenah College-in thuchei leh thilpek an buatsaihte a hlân. College tan football leh volleyball panga ve ve, basketball leh futsal ball pathum ve ve leh mipa leh hmeichhe team tan jersey a pe bawk.

TRC principal Dr Jenifer Lalbiakdiki pawhin thu sawiin, an college-in a tum ber chu, zirlai hlawhtling ni tura zirlaite chher bakah, khua leh tui ṭha ni tura buatsaih a nih thu a sawi.

T Romana College hi kum 1992-ah din a ni a, tun dinhmunah zirlai 1,500 vel an awm mek. NAAC accreditation hnuhnung berah Grade B+ a hmu a ni.