Mizoram humhalh turin sorkarin huaisen takin hma a la mek - MNF

MNF party chuan thuchhuah siamin, MNF kaihhruai Mizoram sorkarin kawng tinrénga Mizo mipui himna tur leh Mizoram chin humhalh turin huaisen takin hma a la mek zel niin an tarlang.

Nimin July 26 kha nikuma Mizoram leh Assam ramri buainaa inkahna, Assam police pasarihin an thih phahna champha a ni tih sawiin MNF chuan, "He ní lo thleng hi ram leh hnam tana kan ngaihtuahna kan hman tharna ní leh kan inhlan thar níah hmang ila kan duh tak zet a ni," an ti.

MNF chuan, March 10, 2018 khan zirlaite leh chanchinbu mite Assam police-in Zophaiah nasa takin kut an thlâk a, silaiin an kâp tih sawiin, "Khatih laia sorkar Congress party khan Mizo zirlaite thlavâng a hauh ngam lo a, mangang takin chhantu nei loin an awm a ni," an ti a; tunah chuan Mizo mipui hmaa ding ngam sorkar a ding tawh niin an sawi.

MNF party tarlan danin, Mizoram ramri humhalh turin ramri-ah hmasawnna hna thawh a pawimawhzia hriain sorkarin ramri hmun hrang hrangah hmasawnna hna a kalpui mek a; ramri chingfel turin deputy chief minister Tawnluia kaihhruai Boundary Committee din a ni a, vawi eng emaw zat ṭhukhawm tawhin, Mizoram ramri atan BEFR 1875 ramri an pawm a ni.

Ramri chingfel turin Mizoram sorkarin Assam sorkar chu inbiakna a neihpui tawh a, inbiakna nei leh turin hmalak mek a ni. July 7, 2022 khan Assam Border minister Atul Bora-a'n Mizoram Home minister Lalchamliana biain, ramri chungchangah inbiak an duh thu a sawi a; chief minister Zoramthanga pawh hmaichhanah ramri chungchang sawipui a duh thu a hrilh bawk.