Helen Lowry College-in zirlaite lawmpui

Helen Lowry College chuan nimin khan an hmunah an college aṭanga graduate tharte lawmpuina leh thlahna inkhawm an buatsaih a, minister of state Lalruatkima'n a hmanpui.

Lalruatkima chuan, mihring nunah lehkha thiam an hlu tih sawiin, "Mi ṭangkai, khawtlang leh ram tana ban rinawm ni turin ramin a beisei a, mi hnawksak emaw, ram leh hnam ti mualpho emaw turin vawiinah hian chawimawi in ni lo," a ti a; zirlaite chu mahni kutkawih thiamna hmanga din chhuah tum turin a chah.

Minister chuan, Helen Lowry College chu kohhranin Isua rawngbawlna a kalpui pawimawh tak - zirtirna leh tihdamna lama hmalakna aṭanga din a nih thu sawiin, zir chhuakte chu kohhran college chhuak an nih avangin mi pawhin an lakah beiseina sang tak an neih thu a sawi.

Helen Lowry College hi kum 2017-ah din a ni a, graduate thar mi 56 an awm. Thawktu mi 20 leh zirlai 120 vel an awm mek a ni.