A hmun dikah chauh leivûng paih turin NHIDCL hriattir

Mizorama national highway kawngpui siam dan enpui tura ruat Committee chuan kawng enkawltu National Highways Infrastructure Develoment Corporation Limited (NHIDCL) leh an hnuaia contractor-te chu leivûng paihna tura ruatah chauh kawng laihna leivûng paih turin an hriattir.

Committee hotute chu July 25, Thawhṭanni khan CMO conference hall-ah an ṭhukhawm a, chairman K Lalsawmvela, adviser to CM (Technical)-in a kaihruai. Environment, Forest & Climate Change Secretary, PHE Secretary, PWD Engineer-in-Chief, Aizawl, Champhai leh Saitual DC te, Mizoram Pollution Control Board Secretary, Lunglei leh Serchhip DC aiawh, GAD leh Save Mizoram Rivers aiawhte an tel.

Ṭhutkhawmah hian NHIDCL hna thawh enpui tura district-a ruat, District Moni­toring Committee leh Divisional Forest Officer-te'n an biala kawng laihna leivûngin environment a nghawng dan te, leivûng paihna hmun tura ruat (spoil bank) enkawl dan leh dan bawhchhiatnate an zirchianna report leh Save Mizoram Rivers-in an thil hmuh dan (report)-te sawiho a ni.

NHIDCL hnuaia contractor-te'n an remchan dan ang angin leivûng an paih nia lang chuan ram leilung leh lui nasa takin a tichhia tih chu Committee hmuh dan a ni. Sawiho hnuah, "Kan ram chhunga NH-te hi chak leh ṭha taka thawh zawh a nih theih nan páwl hrang hrangte'n mahni mawhphurhna ṭheuhah inṭawiawmna ṭha tak nen theihtawp chhuah tlan ni se," an ti.

Zangnadawmna leh forest clearance chungchang chu a rang lama tifel turin mawhphurtute an chah a, "NHIDCL-in an contractor-te dan bawhchhia chu hremna lekin, tun hnuah leivûng paihna hmun tura ruat, dan ang taka buatsaihah chauh leivûng paih tawh se," an ti a; hemi chungchangah hian NHIDCL Executive Director chuan thla hnih chhung hun pe turin a ngen a, thla hnih chhunga theihtawpa hmalak a intiam a ni.

NHIDCL hotute chuan, mimal ram leh reserve forest ram inthuah nia a lan avangin zangnadawmna pek tur tihfel mai theih a nih loh thu an sawi a; EFCC department aṭanga hna thawh phalna an dil an hmuh har avangin harsatna an tawh thu an sawi bawk.