KHAWTHLIR

CM-in PTS tlawh
Chief minister Zoramthanga chuan July 25, Thawhṭanni khan Police Training School (PTS), Thenzawl a tlawh a, PTS hung chhunga inkalpawhna kawng ṭhenkhat siamṭhat ngaite a en. Chief Minister hi PTS hotute'n lo dawngsawngin, an hmunhma tihchangtlun ngaite an lo thlen a; hmasawnna ruhrel din an beisei ṭhenkhatte an sawiho bawk.

Thisen pe
Government Aizawl College NSS chuan nimin khan Mualpuia an campus-ah thisen pek runpui an huaihawt a, Civil Hospital, Aizawl tan thisen unit 182 an pe a, petute mipa 163 leh hmeichhia 19 an ni.

SEDP board ṭhiat turin ngen
PC senior vice president Vanlalruata'n nimin khan an party pisaah thu sawiin, Mizoram sum harsatna siamṭhat bul ṭan nan SEDP board zawng zawng ṭhiat vek turin Mizoram sorkar a ngen a, "Minister, MLA leh officer lian hoin sorkar suma awmpui an lâk zawng zawng a rang thei ang bera titàwp vek turin sorkar ka ngen a ni," tiin a sawi tih PC party thuchhuah chuan a tarlang.

Chawimawina
Indian Council for Child Welfare chuan kum 6-18 inkar naupang huaisente hnenah chawimawina a hlan leh dawn a, October 15, 2022 thleng dilna thehluh theih a ni. Dilna form chu www.iccw.co.in ah lâk theih a ni a, dil chhan chanchin tâwi thumal 250-a sei ziah tel a ngai a; July 1, 2021 aṭanga September 30, 2022 inkara thil thleng pawm a ni ang.

Heroin no.4 man
Zokhawthar police leh 8th Assam Rifles ṭangkawp chuan July 25, Thawhṭanni khan Zokhawthar dáiah heroin no. 4 gram 57 leh a neitua puh Zoramchhuana (49) s/o Chalhnuna leh Lalngilneii (44) w/o Zoramchhuana, Hnahlan ve ve leh, Taz Uddin (24) s/o Muktar Ahmed, Gandharbakani, Karimganj, Assam-te an man. Heroin man hi international market-ah Rs 28,50,000 hû a ni.