Covid-19 positivity rate a la sang zel

July 25, Thawhṭanni khan Mizoramah swab sample 779 endik aṭangin Covid-19 vei mi 197 hmuh chhuah a ni a, positivity rate 25.29% niin, a zawnin ni 10 chhung positivity rate 20% chung lam a ni tawh. Nimin khan hripui vei dam tawh mi 152 chhuahtir an ni a, Covid-19 vanga thi an awm lo.

Thawhṭannia Covid-19 positive hmuh thar mi 197-te chu mipa 98 leh hmeichhia 99 an ni a, rapid antigen test hmanga hmuh vek an ni. July thla chhungin hripui vei mi 2,805 hmuh chhuah a ni tawh.

Mizoramah a záwnin ni 10 chhung Covid positivity rate 20% chung lam a ni tawh a, ni 25 zinga ni 21-ah 20% chung lam niin, ni li-ah 10% chung lam a ni.

Nimin khan hripui vei inenkawl zinga mi 152 chhuahtir an ni a; district tina chhuak zat chu - Aizawlah mi 93, Saitualah 26, Lungleiah 12, Serchhipah paruk, Champhaiah panga, Lawngtlai leh Mamitah pathum ve ve leh, Kolasib leh Khawzawlah pahnih ve ve an ni.

IDSP record angin, Mizoramah Covid-19 vei 2,31,911 hmuh chhuah a ni tawh a, mipa 1,07,994 leh hmeichhia 1,23,917 an ni a, mipa aiin hmeichhia 15,923-in an tam zawk. Nimin tlai dar 5 thleng khan mi 2,30,441 (99.37%) chhuahtir an ni tawh a, mi 708 (0.30%) thi tawhin, enkawl mek mi 762 (0.33%) an awm.

Nimin tlai dinhmun angin, Mizorama district 11 zingah Covid-19 positive awm lohna district a awm tawh lo a, active case tamna ber Aizawl district-ah mi 357 an awm a, Lunglei district-ah mi 147 an awm bawk.