Hmasawnna a rualkhai theih nan NEDP hman tum a ni - CM

NEDP Core Committee chu nimin khan Chief Minister's Office conference room-ah an ṭhukhawm a; meeting kaihruai­tu, chief minister Lal Thanhawla chuan, New Economic De­velopment Policy (NEDP) chu hmasawnna rualkhai zawk a awm theihna atan hman tum a nih thu a sawi.

Chief Minister chuan, NEDP-ah mipui, a bik takin thingtlang lama chengte'n beiseina sang tak an neih thu sawiin, "Kuthnathawktu te, huan neitute leh lo neitute chawikan nan leh hmasawnna rualkhai zawk leh chak zawk a awm thei nan a ṭangkai thei ang ber leh a ṭha thei ang bera duan leh hman tum a ni," a ti.

NEDP hlawhtlinna chu beneficiary-te kutah awm mah se, anmahni kaihruaia kawng kawhhmuh turin sorkar hnathawkte an pawimawh tih sawiin CM Hawla chuan, "Neitu rilru púa beneficiary-te hmalakpuina kawnga sorkar hnathawkte chu a nawr kaltu an ni," a ti a; beneficiary-te ṭanpui tur leh ṭha zawka hma an lak theih nan, a endik leh enthlakna lama thlenga hmalak a ṭul thu a sawi.

Meeting-ah hian kum 2016-17 chhunga NEDP hnuaia hmalaknate an thlir a, ruahmanna siamte chu a kal­pui dan a ṭha tâwkah an ngai. NEDP-in a huam zau avangin ruahmannate chak zawka kalpui a nih theih nan a kalpui dan turah, implementation mechanism ṭha tak duang turin committee din ṭha an ti.

Meeting-a tarlan danin, United Nations Development Programme (UNDP) aiawhte'n NEDP-in thingtlang lama mipui a huam zau zawk nan leh an tana hlâwk zawka kalpui a nih theih nan Village Level Development Programme an ruahman a ni.