CYMA-in mipuite YMA Day chibai a bûk Ṭanpuina Rs. 1,80,000 a pe chhuak dawn

Central YMA chuan Mizo mipui zawng zawng YMA Day vawi 82-na chibai bûkin, hlim taka hmang turin duhsakna a hlan a; YMA Day pual hian pawl 14 hnenah ṭanpuina Rs. 1,80,000 a pe chhuak dawn tih a puang.

CYMA chuan YMA Day pualin thuchah a tichhuak a; YMA Day chu Mizoram sorkarin chawlha a puan avanga lawmthu sawiin, "Sor­karin pisa chawlha a puan remchanga hmanga pawl leh kohhrante'n programme dang siam lo a, he ni hi mi dangte tana inpekna nía hmang ṭheuh tur leh, khua leh veng chhung tana ṭangkai taka hmang ṭheuh turin pawl leh mi tin kan ngen a ni," a ti.

YMA Day hman dan turah CYMA chuan ngenna siamin, YMA Day thupui atan ‘Ram leh hnam humhalh’ hmang tur leh mahni khawtlang ṭheuha a chhe lai leh siamṭhat ngaite siamṭhaa hma la turin a ngen a; ṭhangtharteah tlawmngaihna inzirtir uar tur leh Mizo thuam inbel uar tura ṭan lak nan hmang turin a ngen a ni.

YMA chu ṭanpui ngaite ṭanpui tura pawl din a ni tih tarlangin CYMA chuan, "Veng chhunga mi harsa leh chhumchhiate dapchhuak a, a theih anga ṭanpuina hlan ni se. Branch tinah chenna in thawm ṭhat ngai leh chhuanchham mai turte dapchhuak a, a theih leh remchan anga chhawmdawl turin kan ngen a, mite harsatna sutkiansakna ní leh mang­angte ṭanpuina ní atan hman ni se," an ti.

Central YMA chuan, damlo ṭanpui ngaite tan thisen pe turin YMA branch tin leh mi tin a ngen a; YMA Day chu khua/veng chhung thenfai hnatlang neihna hun atan hmang tur te, a remchan dan azirin damdawi-in, home leh centreah te ṭanpuina thilpek hlanna hun atan hmang turtein a ngen bawk.