KHAWTHLIR

Hûn phal lo
Traffic SP chuan thupek chhuahin, Secretariat Complex hung chhungah mimal lirthei hûn phal a nih loh thu a tarlang a; "Mimal motor hmanga office dàwr tura kal/thawktute chu office hung páwn lama parking-na hmun tura ruatah din/park ṭhin tur a ni," a ti.

Special Drive atan inbuatsaih
July 2017 chhunga kum 18-21 inkar electoral roll-a thunluh rûnpui, Special Drive neih tura inbuatsaihna kal zelah nimin khan Mamit LAD conference hall-ah AERO, BLO, DEO, DRO leh high school leh higher secondary zirtirtute koh khawm an ni a; Special Drive atana hriat tur hrang hrangte an inhrilhfiah.

CM relief fund
Mizo Hnamro Chawisang Pawl, Dawrpui Jail Veng leh Hnathial Block 1 Congress Committee chuan Chief Minister's Relief Dund-ah Rs. 10,000 ve ve an chhung lut.

Parva khuaah Rajnath Singh
Union Home minister Rajnath Singh chuan June 11, 2017-ah Lawngtlai district-a Parva khua a tlawh dawn a; amah lo dawnsawn dan tur ngaihtuahin nimin khan Lawngtlai additional DC H Dolianbuaia hoin a pisaah official-te an ṭhukhawm a, mawhphurhna hrang hrang an insem. Rajnath Singh-a'n a hriat duh angte awlsam taka a hriat theih nan department hrang hrang hmalakna dahkhawmna bu siam an tum a ni.

Police football team leh GNRC inrem
Mizoram Police Football Club player-te an inhliam palha enkawl turin Mizoram Police leh Guwahati Neurological Research Centre (GNRC)-te'n nimin khan thawh dunna thuthlung 'Memorandum of Understanding an ziak. MoU hi DGP Thianghlima Pachuau pisaah ziah a ni a, Mizoram Police aiawhin AIG-I LR Dingliana Sailo-in hming a ziak a, GNRC aiawhin senior manager Arvind Bhatta-a'n hming a ziak thung.