Eco-Club-te'n Hmuifang tlang an thianfai

Mizoram ENVIS (Environmental Information System) Centre, Mizoram Pollution Control Board (MPCB) huaihawtin June 5 khan Hmuifâng tlangah World Environment Day hman a ni a; sikul ṭhenkhata Eco-Club-te telin, Hmuifang tlang an thianfai nghal.

World Environment Day puala hun hman hi Mizoram ENVIS Centre coordinator leh MPCB member secretary C Lalduhawma’n a hmanpui a; tunlaia sorkâr laipuiin a ngaih pawimawh, solid waste management chungchâng sawiin, bawlhhlawhte uluk takin dan ang thlapa sâwngbâwl a ṭûl thu a sawi.

Day puala inkhawm zawhah Synod Higher Secondary School, Modern English School, Greenland Higher Secondary School, Kulikâwn High School, ITI High School, Boston Higher Secondary School, Pine Mount Higher Secondary School, JL High School leh KM Higher Secondary School-a Eco-Club member-te chu an hnatlang a; Hmuifâng tlâng leh a vela bawlhhlawh awmte chhar khâwm a ni. Hmun remchâng laiah bawlhhlawh bâwm an hûn belh a, faina lam inzirtirna thuziak an tár bawk.

Mizoram ENVIS Centre hi sorkar laipuia Ministry of Environment, Forest & Climate Change hnuaia mi a ni a, MPCB-in an enkawl a ni.