Covid-19 kai hmuh chhuah thar sing thum an chuang Enkawl dam nuai ruk chuang awm tawh

Hripui kai nasa takin an pung zel a, nimina Ministry of Health and Family Welfare report tihchhuahah chuan darkar 24 chhungin hri kai hmuh chhuah thar 32,695 an awm a, ni khata hri kai hmuh chhuah tam ber ni a thleng leh.

Hri len ṭantirh aṭang khan ni khata sing thum chuang hri kai hmuh chhuah ni hi a la thleng ngai lo a, nimina kha sing thum chuang kai thar hmuh chhuah ni a thlen hmasak ber ṭum a ni bawk.

India ram hmun hrang hrangah nimina sorkar report tihchhuah thleng khan Covid-19 kai mi 9,68,876 an awm tawh a, hri kai mek 3,31,146 awmin thihpui 606 an awm belh leh a, anni  nen hian nimin thleng khan Covid-19 vanga thi 24,915 an awm tawh. 

Nimin piah sorkar report aiin nimin report-ah khan hri kai hmuh chhuah thar 3,266 laiin an tam zawk a ni.

Hripui kai hmuh chhuah thar tam tak awm bawk mah se enkawl dam pawh an tam tawh hle a, nimin thleng khan mi 6,12,815 enkawl dam an awm tawh a, a ṭum khatna atan nuai ruk chuang enkawl dam an awm tawh a ni. MoHFW report tihchhuah hma darkar 24 chhungin dama puan 20,783 an awm bawk a, hri kai dam leh tawh rate hi 63.25% a ni.

Indian Council of Medical Research (ICMR) chuan nimina report an tihchhuahah darkar 24 chhungin sample 3,26,682 an endik tih an tarlang a, hei hi ṭum eng emaw zatna atan ni khata an test tam ber ni a ni leh. Hri len ṭantirh 

aṭanga nimin thleng khan Covid-19 sample 1,27,39,490 an test tawh a ni. Ramchhung hmun hrang hrangah ICMR-in sample test-na atana laboratory pawmpui 1,234 a nei tawh a, 874 chu sorkar laboratory niin 360 chu private laboratory a ni thung.